კახა ფირუაშვილის განცხადებას საკრებულოს ფრაქციის "ქართული ოცნება-თბილისელები" თავმჯდომარე ეხმიანება. ზუმბაძემ კიდევ ერთხელ აღნიშნა, რომ ე.წ. "ხრუშჩოვკებთან'' დაკავშირებული მემორანდუმი საკუთრივ პროექტის არსებობის თაობაზე სერიოზულ ეჭვებს ბადებს.
მისივე განცხადებით ე.წ. "ხრუშჩოვკებთან'' დაკავშირებული ინიციატივა საზოგადოებისთვის უნდა ყოფილიყო ცნობილი და ამასთან, ფართო განხილვის საგანიც უნდა გამხდარიყო.ფრაქციის თავმჯდომარე საკუთარი ფრაქციის წევრის განცხადებას თითიდან გამოწოვილსა და არაადეკვატურს უწოდებს.
ზუმბაძის ინფორმაციით, კახაბერ ფირუაშვილი ფრაქციის დატოვებით ჯერ კიდევ ირაკლი შიხიაშვილის საკრებულოს თავმჯდომარედ არჩევის დროს იმუქრებოდა, რადგან ახალი უმრავლესობიდან მის თავმჯდომარედ არჩევას ერთადერთმა დეპუტატმა, გულიკო ზუმბაძემ არ მისცა ხმა.
ზუმბაძე ასევე მიიჩნევს, რომ ფრაქციის შესაძლო დაშლა მისი, როგორც დეპუტატის უფლებამოსილებას არანაირად არ შეზღუდავს, პირიქით, გარკვეული გადაწყვეტილებების მიღებისას მისი ქმედებები ბევრად თავისუფალი იქნება, თუმცა მისივე აზრით, ახლა ამის დრო არ არის, რადგან საკრებულოში ამ ეტაპზე უმრავლესობის სერიოზული კრიზისია და არჩევნებამდე ორი თვით ადრე არც საკრებულოს თავმჯდომარის იმპიჩმენტი და არც ახალი უმრავლესობის შექმნაა გამორიცხული.
შეგახსენებთ, რომ საკრებულოს ფრაქციის "ქართული ოცნება-თბილისელების" თავმჯდომარის გულიკო ზუმბაძის გუშინდელ განცხადებას ამავე ფრაქციის წევრი კახაბერ ფირუაშვილი დღეს გამოეხმაურა. დეპუტატის თქმით, ზუმბაძემ გუშინ განცხადება მემორანდუმის შესახებ, ასევე საკრებულოს მოქმედი თავმჯდომარის წინააღმდეგაც გააკეთა და აღნიშნა, რომ შიხიაშვილი კორუფციულ გარიგებებშია ჩართული.
ფირუაშვილის განაცხადებით, გულიკო ზუმბაძესთან დაკავშირება გუშინვე სცადა, თუმცა ფრაქციის თავმჯდომარემ მის სატელეფონო ზარებს არ უპასუხა და შესაბამისად, ვერც ფრაქციის წევრების შეკრება ვერ მოხერხდა.
"ჩვენი ურთიერთობის ფორმა რადგან საჯარო გახდა, მეც ასევე საჯაროდ ვითხოვ განმარტებას იმის თაობაზე, თუ რა იგულისხმა მან კორუფციულ გარიგებასა და თაღლითობაში. წინააღმდეგ შემთხვევაში მე დავტოვებ აღნიშნულ ფრაქციას'',-განაცხადა ფირუაშვილმა.
ამასთან კახაბერ ფირუაშვილი ფრაქციის ,,ქართული ოცნება-თბილისელების"' შესაძლო დატოვებას არ გამორიცხავს
