პარლამენტის იურიდიულ საკითხთა კომიტეტის თავმჯდომარის ვახტანგ ხმალაძის შეფასებით, ანტიდისკრიმინაციული კანონპროექტიდან დისკრიმინაციის ნიშნების განმსაზღვრელი პუნქტის ამოღება მიზანშეწონილი არ იქნება.
როგორც ხმალაძემ დღეს გამართულ პრესკონფერენციაზე განაცხადა, კანონში ამგვარი ჩამონათვალის არსებობას გააჩნია არა სამართლებრივი, არამედ პოლიტიკური დატვირთვა.
მისი განმარტებით, როცა კანონში იწერება, რომ აკრძალულია ნებისმიერი ნიშნით დისკრიმინაცია, სამართლებრივი თვალსაზრისით ამ დროს არანაირი ჩამონათვალი საჭირო არ არის.
რაც შეეხება კანონპროექტში არსებულ კიდევ ერთ ჩამონათვალს, რომელიც კანონის მოქმედების სფეროებს აკონკრეტებს, ვახტანდ ხმალაძეს მისი არსებობა ზედმეტად მიაჩნია.
დეპუტატი დღევანდელ პრესკონფერენციაზე არასამთავრობო სექტორის მიმართვასაც გამოეხმაურა.
"სანქციების დაწესება არა სასამართლოს, არამედ შემმოწმებლის მიერ დამოკიდებულია მოდელზე, თუ როგორი მოდელი იქნება შემოღებული. თუ შემმოწმებელი ადმინისტრაციული ორგანო იქნება, მაშინ სავსებით შესაძლებელია, რომ მას დაჯარიმების უფლება მიეცეს. თუკი ის იქნება სახალხო დამცველი, მაშინ მიზანშეუწონელია მას დაჯარიმების უფლება მიეცეს, რადგან სახალხო დამცველი ადმინისტრაციული ორგანო არ არის - ის კონსტიტუციური ინსტიტუტია, რომლის მიმართაც აუცილებელია შენარჩუნებულ იქნას ნდობის მაღალი ხარისხი. ამიტომ სახალხო დამცველისათვის სანქციის დაკისრების უფლება არ იქნებოდა სწორი. წარმოდგენილი კანონპროექტით აღებულია მოდელი, რომ დისკრიმინაციის შემთხვევები სახალხო დამცველმა შეამოწმოს. მას უფლება აქვს დასვას საკითხი უფლებამოსილი პირის წინაშე, რომ დისკრიმინაცია აღმოფხვარს. თუ საქმე ისეთ დარღვევამდე მივიდა, რომლისთვისაც გათვალისწინებულია ან ადმინისტრაციული სახდელი ან სისხლის სამართლებრივი, მაშინ არის სასამართლო და სანქციები სასამართლომ უნდა დააკისროს. ", - განმარტა ვახტანგ ხმალაძემ.
