განათლებისა და მეცნიერების ყოფილი მინისტრი დიმიტრი შაშკინი პრეზიდენტ გიორგი მარგველაშვილის განცხადებას ეხმიანება და მას ამორალურს უწოდებს.
,,ამორალური და არასწორია მარგველაშვილის მოწოდება დასავლეთისთვის, რომ არ მოხდეს რუსეთის იზოლაცია და დასჯა იმისათვის, რასაც ის ახლა უკრაინაში აკეთებს, რაც საქართველოში გააკეთა და კიდევ არავინ იცის რას გააკეთებს. ეს არის 2008 და 2013 წლებში დაღუპული ასობით ქართველისა და უკრაინელის შეურაცხყოფა. როცა დამნაშავე კლავს და ყაჩაღობს, მას ციხეში პირველ რიგში იმისთვის სვამენ, რომ მოხდეს მისი იზოლაცია, საზოგადოება იყოს უფრო დაცული და მოხდეს მომავალი დანაშაულის პრევენცია. კარგი იქნება, თუ მარგველაშვილი ამას მიხვდება, და გაითვალისწინებს, რომ ის პრეზიდენტია და არა დალაი ლამა", _წერს სოციალურ ქსელში შაშკინი.
,,რუსეთის იზოლირება არასწორი არჩევანია, - ამის შესახებ საქართველოს პრეზიდენტმა გიორგი მარგველაშვილმა პრაღაში ვიზიტისას, სააგენტო "Associated Press"-ს განუცხადა.
"არ ვფიქრობ, რომ სწორი არჩევანი იყოს რუსეთის გარიყვა და მასთან ურთიერთობების გაწყვეტა, ვინაიდან იზოლირება რუსეთს კიდევ უფრო აგრესიულს, არაპროგნოზირებადსა და სახიფათოს ხდის", - აღნიშნა გიორგი მარგველაშვილმა.
