"ნაციონალური მოძრაობის" წევრი გია თევდორაძე პროკურატურას უპასუხისმგებლობაში, ხოლო დეპუტატ ეკა ბესელიას სიცრუის გავრცელებაში ადანაშაულებს.
საქმე ეხება ადამიანის უფლებების დაცვის საპარლამენტო კომიტეტის თავმჯდომარის ეკა ბესელიას განცხადებას, სადაც მან აღნიშნა, რომ გია თევდორაძის ოჯახის წლიური შემოსავალი 5 მილიონ ლარს აჭარბებს.
გია თევდორაძის თქმით, მან ამასთან დაკავშირებით პროკურატურას რეაგირებისთვის უკვე მიმართა, თუმცა, პასუხი ჯერჯერობით არ მიუღია.
,, ეკა ბესელიამ თავისი მოსაზრების დამადასტურებლად მოიყვანა არასამთავრობო ორგანიზაცია ,,ახალგაზრდა ადვოკატთა" კვლევა, თუმცა, ამ არასამთავრობოს კვლევაში ჩემს შესახებ საუბარიც არ ყოფილა. ეს იყო მიზანმიმართული განცხადება ბესელიას მხრიდან, რადგან მას სურდა, რომ საზოგადოება შეცდომაში შეეყვანა, ხოლო ჩემზე დაემკვიდრებინა ის წარმოდგენა, რომ თითქოს ქალაქში სხვადასხვა ბიზნესს ვფლობ. მზად ვარ, ჩემს ქონებასთან დაკავშირებით ყველა კითხვას ვუპასუხო. თუ რამე გააჩნია ჩემს ოჯახს, სახელმწიფო სამსახურში საქმიანობასთან ეს არაფერ შუაშია", - განაცხადა გია თევდორაძემ.
