პარლამენტის თავმჯდომარის დავით უსუფაშვილის განცხადებით, ევროკავშირის კარი საქართველოსთვის ღიაა, მაგრამ ეს არ ნიშნავს, რომ იქ შესვლა უკვე შეგვიძლია, რადგან პოლონეთს, ჩეხეთს და ბალტიისპირეთის ქვეყნებს წლები დასჭირდათ ევროკავშირში გაწევრიანებისათვის.
ამის შესახებ პარლამენტის თავმჯდომარემ გერმანის საგარეო საქმეთა მინისტრის ფრანკ-ვალტერ შტაინმაიერის განცხადების შეფასებისას აღნიშნა, რომლის თანახმად, წინასწარ ვერ განისაზღვრება, თუ რა მოხდება 10,15 -20 წლის შემდეგ.
"პირველად მოხდა, როცა რამდენიმე დღის წინ ევროპარლამენტმა მკაფიოდ განაცხადა, რომ საქართველოს, მოლდოვას, უკრაინას აქვთ ევროპული პერსპექტივა. ეს ნიშნავს იმას, რომ ევროკავშირის კონტიტუციის 49-ე მუხლი გამოყენებადია საქართველოსთვისაც. ეს ასევე ნიშნავს იმას, რომ ევროკავშირის კარი საქართველოსთვის დახურული კი არ არის, ღიაა, მაგრამ ეს არ ნიშნავს იმას, რომ ჩვენ იქ შეგვიძლია, წავიდეთ და შევიდეთ ხვალვე. ასე არც ერთი ქვეყანა არ გაწევრიანებულა ევროკავშირში. პოლონეთი, ჩეხეთი, ბალტიისპირეთის ქვეყნები წლების განმავლობაში იცდიდნენ და მუშაობდნენ ევროკავშირში გაწევრიანებისთვის. ზოგ მათგანს 10 წელზე მეტიც დასჭირდა. როცა საუბარია იმაზე, რომ ახლა ასოცირების ხელშეკრულებაა მთავარი ამოცანა, დიახ, ეს ასეა და 10-20-25 წლის შემდეგ რა იქნება, ეს არის იმაზე მინიშნება, რომ შეიძლება, უფრო მალე მოხდეს, შეიძლება, უფრო გვიან. არ იქნება რაიმე პრინციპი, რომ ევროპა ჩაკეტილია და სამხრეთ კავკასიის რომელიმე ქვეყანა მისი წევრი ვერ გახდება. ეს ბარიერი იხსნება და ეს არის ბოლო მოვლენები, რაც ძალიან მნიშვნელოვანია ჩვენი ქვეყნისთვის და ეს ორივე მინისტრმა დაადასტურა", - განაცხადა უსუფაშვილმა.
