საყდრისის გადარჩენის საზოგადოებრივი კომიტეტის ინფორმაციით, გუშინ დაიწყო და ამ დრომდე გრძელდება საყდრისის ისტორიული საბადოდან მადნის გატანა.
საყდრისის ტერიტორიაზე იმყოფებიან RMG-ს დაცვისა და უსაფრთხოების სამსახურის თანამშრომლები, ასევე სამართალდამცავები.
როგორც საყდრისის გადარჩენის საზოგადოებრივი კომიტეტის წევრები აცხადებენ, იმ ადგილიდან, სადაც მათ კარვები აქვთ გაშლილი, კარგად ჩანს სატვირთო ავტომანქანები, რომელებსაც სავარაუდოდ, მოპოვებული მადანი კომპანია RMG-ს საწარმოებში მიაქვთ.
დღეს, 16:00 საათისთვის საყდრისის გადარჩენის საზოგადოებრივი კომიტეტის წევრები საგანგებო ბრიფინგს გამართავენ.
ახალგაზრდა იურისტთა ასოციაციის თავმჯდომარე კახა კოჟორიძე გუშინ RMG-ს ერთ-ერთ დირექტორს სოსო ცინცაძეს დაუკავშირდა და შეახსენა, რომ სასამართლოში გასაჩივრებულია ის აქტი, რომლის საფუძველზეც სახელმწიფომ ნება დართო საყდრისის ტერიტორიაზე სამუშაოები განახლებულიყო.
მისივე თქმით, სასამართლო პროცესის დასრულებამდე, კომპანიას უფლება არ ჰქონდა საყდრისის ტერიტორიაზე მადნის მოპოვება გაეგრძელებინა.
როგორც საზოგადოებრივი კომიტეტის წევრები აცხადებენ, დღეს ისინი რადიკალურ ზომებს მიმართავენ, თუმცა რა ფორმით გამოხატავენ პროტესტს, ჯერჯერობით არ აკონკრეტებენ.
