უკრაინის ხელისუფლება მზად არის, რუსულ ენას ოფიციალური ენის სტატუსი და ქვეყნის რეგიონებს ფინანსური და ეკონომიკური ავტონომიები მიანიჭოს .
"უკრაინსკაია პრავდას" ინფორმაციით, აღნიშნული განცხადება ქვეყნის უმაღლეს რადაში პრეზიდენტის მოვალეობის შემსრულებელმა ალექსანდრ ტურჩინოვმა და პრემიერმინისტრმა არსენი იაცენიუკმა გააკეთეს.
ტურჩინოვის თქმით, "ხელისუფლება მზად არის, უკრაინული სახელმწიფო ენის
პარალელურად რუსულ ენას ოფიციალური სტატუსი მიანიჭოს იმ რეგიონებში, სადაც ამ ენის მატარებლების მნიშვნელოვანი ნაწილი ცხოვრობს. უკრაინის ხელისუფლებამ რადაში წარადგინა კანონპროექტი იმ პირთა დევნის დაუშვებლობის შესახებ, რომლებიც მასობრივ საპროტესტო აქციებში მონაწილეობდნენ", - აღნიშნა ტურჩინოვმა. თუმცა, ამნისტიას უნდა უძღვოდეს იარაღის ჩაბარება და შენობების გათავისუფლება.
თავის მხრივ, არსენი იაცენიუკმა პირობა დადო, რომ ქვეყანაში დაიწყება ფართომასშტაბიანი საკონსტიტუციო რეფორმა და რეგიონებს ეკონომიკურ და ფინანსურ ავტონომიებს დაჰპირდა.
"ხელისუფლება მზად არის შეცვალოს საბიუჯეტო და საგადასახადო კოდექსები და უკრაინის თითოეული რეგიონი სათანადო ფინანსური რესურსით შეავსოს", - განაცხადა პრემიერმა.
