საქართველოს ხელისუფლება რუსეთის ფედერაციასთან ამ ეტაპზე ღია საფრთხეს არ ხედავს.
აღნიშნულის შესახებ საქართველოს პრეზიდენტმა გიორგი მარგველაშვილმა უსაფრთხოებისა და საგარეო პოლიტიკის ექსპერტებთან შეხვედრის დასრულების შემდეგ, ჟურნალისტებთან საუბარში განაცხადა.
აღნიშნული განმარტება მარგველაშვილმა იმის საპასუხოდ გააკეთა, თუ რა საფრთხეს ელოდება ქვეყანა ასოცირების ხელშეკრულების ხელმოწერის, ასევე ნატო-ს სამიტის წინ უკრაინის მაგალითის გათვალისწინებით.
როგორც პრეზიდენტმა აღნიშნა, ეს კითხვა სიღრმისეულია და უპრიანი იქნებოდა, ამ კითხვისთვის გადაცემის ფორმატში ეპასუხა.
"ორი წინადადებით შემიძლია გიპასუხოთ. ჩვენ ამ ეტაპზე არ ვაფიქსირებთ რაიმე ღია დაპირისპირებას, რომელიც შეიძლება არსებობდეს რუსეთის ფედერაციასთან. არ ვხედავთ ღია საფრთხეს. მიუხედავად იმისა, რომ სამწუხაროდ ანალოგები 2008 წელში არსებობდა და ასევე 2014-ში უკრაინის შემთხვევაში. ჩვენ ასეთ საფრთხეს არ ვხედავთ", - განაცხადა გიორგი მარგველაშვილმა.
მისივე თქმით, ასეთ შემთხვევებში საქართველოს ხელისუფლებამ უნდა გააკეთოს ის, რომ უნდა იყოს მეტი სტაბილურობა და ერთიანი პოზიცია საგარეო პოლიტიკასთან დაკავშირებით.
