საარჩევნო ბლოკი "არასაპარლამენტო ოპოზიცია" ხელისუფლებისგან მოითხოვს, საკანონმდებლო დონეზე დაადგინოს ძალიან მკაფიო რეგულაციები პერსონალური მონაცემების შემცველი ინფორმაციის როგორც მოპოვების, ისე მათი შენახვის და განადგურების რეჟიმის უზრუნველსაყოფად.
აღნიშნული მოთხოვნის საფუძველზე ახლადშექმნილი საარჩევნო ბლოკი
საზოგადოებრივ კამპანია "ეს შენ გეხებას" უერთდება.
როგორც დღევანდელ პრესკონფერენციაზე საარჩევნო ბლოკ "არასაპარლამენტო ოპოზიციის" ერთერთმა ლიდერმა მანანა ნაჭყებიამ აღნიშნა, 2012 წლის 1 ოქტომბრის არჩევნების შემდეგ, საზოგადოების მოლოდინი იყო, რომ ახალი ხელისუფლება გარანტირებულად უზრუნველყოფდა მოქალაქეების პირადი ცხოვრების დაცვას და უარს იტყოდა უკანონო მიყურადებისა და თვალთვალის მანკიერ, ადამიანის უფლებების შემლახავ დანაშაულებრივ ქმედებებზე, რომელსაც 9 წლის განმავლობაში ჰქონდა ადგილი ჩვენს ქვეყანაში.
მისივე თქმით, სამოქალაქო სექტორის მიერ ინიცირებულია მთელი რიგი საკანონმდებლო ცვლილებები, რამაც უნდა უზრუნველყოს ბალანსი კანონით დაცულ პირადი ცხოვრების უფლებასა და სახელმწიფო უშიშროებისა თუ საზოგადოებრივი უსაფრთხოების ინტერესს შორის.
"საარჩევნო ბლოკი "არასაპარლამენტო ოპოზიცია და მასში შემავალი პოლიტიკური პარტიები "ახალი მემარჯვენეები" და "თავისუფალი საქართველო" წლების განმავლობაში ვიბრძოდით ქვეყანაში დემოკრატიული ღირებულებების დასამკვიდრებლად, რომელთაგან ერთერთი უმთავრესი ადამიანის უფლებაა - დაცული და ხელშეუხებელი იყოს მისი პირადი ცხოვრება. მთლიანად ვუჭერთ მხარს სამოქალაქო სექტორის აქტივობას, ვუერთდებით საზოგადოებრივ კამპანიას "ეს შენ გეხება" და მოვითხოვთ ხელისუფლებისგან დემოკრატიული სახელმწიფოების სტანდარტების შესაბამისად საკანონმდებლო დონეზე დაადგინოს ძალიან მკაფიო რეგულაციები პერსონალური მონაცემების შემცველი ინფორმაციის როგორც მოპოვების, ისე მათი შენახვის და განადგურების რეჟიმის უზრუნველსაყოფად", - აღნიშნა მანანა ნაჭყებიამ.
