არასაპარლამენტო კოალიცია ,,ბურჯანაძე-ერთიანი ოპოზიცია" ადგილობრივი თვითმმართველობის არჩევნების შემდეგ, აპირებს ვადამდელი არჩევნებისთვის მზადება და მისი ჩატარება მოითხოვოს.
"ერთად გავაგრძელებთ საპარლამენტო არჩევნებისთვის ბრძოლას, აქედან ყველა არა, მაგრამ ნაწილი, მათ შორის ,,ქრისტიან-დემოკრატები", არჩევნების შემდეგ შეუერთდება ,,დემოკრატიულ მოძრაობას" და ,,დემოკრატიული მოძრაობა" იქნება ფლაგმანი მომავალი საპარლამენტო არჩევნების დროს", - აცხადებს ახლადშექმნილი გაერთიანების ლიდერი ნინო ბურჯანაძე საკუთარ ვებ-გვერდზე.
მისივე თქმით, ,,ნაციონალური მოძრაობა" ისე გაძლიერდა, რომ თბილისის მერის არჩევნების მოგების პრეტენზია გაუჩნდა, რაც ნინო ბურჯანაძის აზრით, ,,ქართული ოცნებისა" და ბიძინა ივანიშვილის ბრალია.
"ამას ჩვენ ვერ შევეგუებით. ვხედავ, რომ ქვეყანას არც საგარეო პოლიტიკა აქვს და არც საშინაო. ადამიანების მდგომარეობა არა თუ გაუმჯობესდა, არამედ ყოველდღე უარესდება. აქედან გამომდინარე, აუცილებლად ვთვლიდი, რომ ძლიერი ოპოზიციური ერთობა უნდა შემდგარიყო", -აცხადებს ნინო ბურჯანაძე.
"დემოკრატიული მოძრაობა -ერთიანი საქართველოს" ლიდერის თქმით, მისი და "ქდმ"-ს ერთ კოალიციაში გაერთიანების საკითხში მნიშვნელოვანი აღმოჩნდა ის ფაქტორი, რომ ადამიანები თავიანთი განვლილი გზიდან გამომდინარე, ახერხებდნენ შეცდომის აღიარებას.
"ის, რომ გიორგი თარგამაძემ პოლიტიკიდან წასვლის გადაწყვეტილება მიიღო,
იმაზე მეტყველებს, რომ მან დაინახა საკუთარი შეცდომა. არ მინდა ამ თემაზე ლაპარაკი, ეს ჩემი მხრიდან არაკორექტული იქნება," - მიაჩნია ნინო ბურჯანაძეს.
