იუსტიციის მინისტრმა, უწყებათაშორისი კომისიის თავმჯდომარემ თეა წულუკიანმა ყველა პარტიის აქტივისტს, მათ შორის არასამთავრობო და სახალხო მოძრაობის მხარდამჭერებს მოუწოდა თავი შეიკავონ იმ ადგილებში მისვლაზე სადაც მათთვის მიუღებელი პოზიცია გამოითქმის. როგორც წულუკიანმა უწყებათაშორისი კომისიის სხდომაზე განაცხადა არჩევნები პოლიტიკური კანდიდატებს, პარტიებს შორის შეჯიბრია და ამ შეჯიბრისთვის ხელისშეშლის უფლება არავის არ აქვს.
,, მინდა მოვუწოდო ყველა პარტიის აქტივისტს და ყველა არასამთავრობო ორგანიზაციებს, მათ შორის სახალხო მოძრაობებს თავი შეიკავონ მივიდნენ იმ შეხვედრებზე სადაც გამოითქმის მათთვის მიუღებელი პოლიტიკური, ან სხვა ტიპის მოწოდებები. არჩევნები არის პოლიტიკურ კანდიდატებსა და პარტიებს შორის შეჯიბრი და ამ შეჯიბრისთვის ხელისშეშლისა უფლება არავის არ აქვს დემოკრატიულ საზოგადოებაში", _განაცხადა წულუკიანმა.
შეგახსენებთ, რომ იუსტიციის სახლში უწყებათაშორისი კომისიის სხდომა მიმდინარეობს. თვითმმართველობის არჩევნებამდე ჯგუფი მუშაობას სისტემატურ რეჟიმში იწყებს.
შეხვედრას ესწრება "ნაციონალური მოძრაობაც". უმცირესობამ კომისიას საპრეზიდენტო არჩევნებამდე ბოიკოტი გამოუცხადა, მაგრამ ახლა სხდომაზე დასწრების გადაწყვეტილება მიიღო. როგორც ჟურნალისტებს სხდომის დაწყების წინ, "ნაციონალური მოძრაობის" წევრმა, ზურაბ ჭიაბერაშვილმა განუცხადა, ის უწყებათაშორისი კომისიისგან მოითხოვს ძალადობის ფაქტებზე ადეკვატური რეაგირების მოხდენას.
