"ნაციონალურმა მოძრაობამ" უწყებათაშორისი კომისიის მუშაობაში მონაწილეობა გადაწყვიტა.
საპარლამენტო უმცირესობის წევრის მიხეილ მაჭავარიანის განცხადებით, მიუხედავად იმისა, რომ მათი შენიშვნები და წინადადებები საპრეზიდენტო არჩევნების წინ საერთოდ არ იყო გათვალისწინებული, ოპოზიციამ სხდომაზე დასწრების გადაწყვეტილება მაინც მიიღო.
უწყებათაშორისი კომისიის შეხვედრა დღეს გაიმართება.
მიხეილ მაჭავარიანის განმარტებით, გადაწყვეტილების შეცვლის მიზეზი მძიმე წინასაარჩევნო პერიოდია, რადგან მიმდინარეობს მათი აქტივისტების დაკავება, მმართველი პარტიის აქტივისტები კი ოპოზიციის წინასაარჩევნო შეხვედრების ჩაშლას ცდილობენ.
უწყებათაშორისი კომისიის მიზანია, ადგილობრივი თვითმმართველობის არჩევნებისას საჯარო მოსამსახურეების მიერ საარჩევნო კანონმდებლობის დარღვევების პრევენცია, გამოვლენილ დარღვევებზე რეაგირება და ამ გზით თავისუფალი და სამართლიანი საარჩევნო გარემოს შექმნა.
კომისია თანამშრომლობს კვალიფიციურ საარჩევნო სუბიექტებთან, საარჩევნო პროცესში ჩართულ პოლიტიკურ ძალებთან, ადგილობრივ და საერთაშორისო ორგანიზაციებთან, დამკვირვებლებთან და სხვა დაინტერესებულ პირებთან.
უწყებათაშორისი კომისია საქმიანობას ცენტრალური საარჩევნო კომისიის მიერ არჩევნების საბოლოო შედეგების ოფიციალურად გამოქვეყნების დღიდან შეწყვეტს.