"საქართველოსთან ასოცირების ხელშეკრულების ხელმოწერისთვის მზადება სწრაფი ტემპით მიმდინარეობს, არ არსებობს კითხვის ნიშნები და სწორედ ამის გამო, დარწმუნებული ვარ, რომ ყველაფერი გეგმის მიხედვით განხორციელდება და ასოცირების ხელშეკრულებას, ღრმა და ყოვლისმომცველი თავისუფალი ვაჭრობის სივრცის კომპონენტის ჩათვლით, ძალიან მალე მოეწერება ხელი"- ამის შესახებ გერმანიის საგრეო საქმეთა მინისტრმა შტაინმაიერმა ქართველ კოლეგასთან მაია ფანჯიკიძესთან გამართული შეხვედრის შემდეგ განაცხადა,
გერმანიის საგარეო უწყების ხელმძღვანელის თქმით საქართველოს საერთაშორისო თანამეგობრობის სრული მხარდაჭერა აქვს. "აღსანიშნავია საქართველოს მიერ მიღწეული წარმატება დემოკრატიზაციის პროცესში და რეფორმების ის კურსი, რომელსაც თქვენი ხელისუფლება მიჰყვება. მსურს ამ კურსის მხარდაჭერა გამოვხატო და დაგარწმუნოთ, რომ თქვენ გექნებათ საერთაშორისო თანამეგობრობის მხარდაჭერა, ეს ეხება საქართველოს თანამშრომლობის განვითარებას როგორც ევროკავშირთან, ისე ნატოსთან"-აღნიშნა შტაინმაიერმა.
მისივე განცხადებით უკრაინის კრიზისი გავლენას არ მოახდენს საქართველო-ევროკავშირის დიალოგზე, ისევე, როგორც ბუქარესტის სამიტის გადაწყვეტილებაზე. გერმანიის საგარეო საქმეთა მინისტრის თქმით, მიმდინარეობს მუშაობა თანამშრომლობის ახალ პაკეტზე, რომელსაც უახლოეს კვირათა განმავლობაში განიხილავენ და შესაბამის დასკვნებს გამოიტანენ.
"რუსეთის ქმედებები ყირიმთან დაკავშირებით მიუღებელია ყველა თვალსაზრისით, როგორც საერთაშორისო პოლიტიკის, ისე საერთაშორისო სამართლის კუთხით. ჩვენ ყველაფერი უნდა გავაკეთოთ იმისათვის, რომ უკრაინას პოლიტიკური და ეკონომიკური კოლაფსი თავიდან ავარიდოთ.
უკრაინის კრიზისი არის ერთ-ერთი ყველაზე სერიოზული კრიზისი, რომელიც ჩვენ ევროპაში გვინახავს, მაგრამ ამან არ უნდა მოახდინოს უარყოფითი გავლენა ჩვენს დიალოგზე საქართველოსთან ასოცირების პროცესისა და ბუქარესტის და მისი შემდგომი ფორუმების გადაწყვეტილებების კუთხით. ჩვენ ვმუშაობთ რიგ საკითხებზე, რომლებსაც უახლოეს კვირებში მოთმინებით განვიხილავთ და გარკვეულ დასკვნებსაც გამოვიტანთ"-აღნიშნა შტაინმაიერმა.
საქართველოს საგარეო საქმეთა მინისტრი მაია ფანჯიკიძე გერმანელ კოლეგას ბერლინში, სამუშაო ვიზიტის ფარგლებში შეხვდა.
