ყველანაირ სამართლებრივ ბერკეტს გამოვიყენებთ იმისთვის, რომ მასწავლებელი შევიყვანოთ გაკვეთილზე, - განაცხადა განათლების მინისტრმა, თამარ სანიკიძემ. მისი თქმით, 53-ე სკოლაში მიმდინარე პროცესები არანორმალურია.
"53-ე სკოლაში პროცესები არ მიმდინარეობს ნორმალურად და ამას ხელს უწყობენ სკოლის ყოფილი დირექტორი და სამწუხაროდ, პედაგოგთა ნაწილი. მე მგონი, ეს ხალხი საერთოდ ვერ გრძნობს იმ პასუხისმგებლობას, რომელიც აკისრიათ მოსწავლეებთან მიმართებაში. გუშინ მთელი საღამო შემოდიოდა ზარები შეწუხებული მშობლებისგან, რომ მათ სთხოვენ, გამოვიდნენ და აქციები მოაწყონ ქუჩაში. ეს დაუშვებელია. შესაბამისად, ყველანაირ სამართლებრივ ბერკეტს გამოვიყენებთ იმისთვის, რომ მასწავლებელი შევიყვანოთ გაკვეთილზე, ბავშვი არ დაზარალდეს და სკოლაში საგაკვეთილო პროცესს საფრთხე არ შეექმნას", - აცხადებს სანიკიძე.
შეგახსენებთ, რომ თბილისის 53 -ე საჯარო სკოლაში სასწავლო პროცესი რამდენიმე დღეა ჩაშლილია. მასწავლებლები ყოფილი დირექტორის მარიამ რამინაშვილის დაბრუნებას მოითხოვს. განათლების სამინსტროს მიერ ახალი დირექტორის, ეკა გახარიას დანიშვნამ მასწავლებლების პროტესტი გამოიწვია.
მასალის გამოყენების პირობები