საქართველოს საგარეო საქმეთა მინისტრი მაია ფანჯიკიძე თავის დანიელ კოლეგას, მარტინ ლიდეგორდს შეხვდა. შეხვედრაზე მხარეებმა განიხილეს საქართველოში მიმდინარე პოლიტიკური პროცესები, ორმხრივი და მრავალმხრივი თანამშრომლობის საკითხები და შემდგომი განვითარების პერსპექტივები. დანიური მხრიდან, განსაკუთრებულად ხაზი გაესვა სავაჭრო-ეკონომიკური ურთიერთობების გააქტიურებისა და ენერგეტიკის სფეროში თანამშრომლობის ინიცირების მნიშვნელობას. საუბარი ასევე შეეხო დანიის სამეზობლო პროგრამის ფარგლებში დახმარების გაგრძელების აუცილებლობას.
განხილულ იქნა ევროპულ და ევრო-ატლანტიკურ სტრუქტურებში საქართველოს ინტეგრაციის პროცესი და ამ მიმართულებით, ბოლო პერიოდში მიღწეული წარმატებები. ევროკავშირთან დაახლოების კონტექსტში კი ყურადღება გამახვილდა ასოცირების შესახებ შეთანხმების დროული ხელმოწერის მნიშვნელობასა და შემდგომ ეფექტიან იმპლემენტაციაზე.
მხარეებმა მიმოიხილეს უკრაინაში განვითარებული მოვლენები და რეგიონალური უსაფრთხოების საკითხები. ხაზი გაესვა საქართველოს ოკუპირებულ ტერიტორიებზე არსებულ ვითარებას და ჟენევის მოლაპარაკებათა ფორმატის მნიშვნელობას.
შეხვედრაზე დანიის მხარემ კიდევ ერთხელ დაადასტურა საქართველოს სუვერენიტეტისა და ტერიტორიული მთლიანობის, აგრეთვე ევროპული და ევრო-ატლანტიკური ინტეგრაციის მხარდაჭერა.
მასალის გამოყენების პირობები
