გამოფენა მიეძღვნა ქართული ჯარის განვითარების ისტორიას მე-15-ე საუკუნიდან დღემდე. წარმოდგენილი იყო ექვსი საგამოფენო დაფა, რომელთაგან თითოეული ასახავდა ქართული ჯარის განვითარების კონკრეტულ ეტაპს, მათ შორის, ფეოდალური ხანის ჯარისკაცის აღჭურვილობა, ერეკლეს ეტრატები, ვახუშტის რუკა, პირველი რესპუბლიკის პერიოდის ისტორიული დოკუმენტები, იუნკერების ფოტოები, საქართველოს გასაბჭოების შემდეგ უცხო ქვეყნებში მომსახურე ქართველი ოფიცრების ფოტოები, რუსეთ-საქართველოს ომის (1992 და 2008 წლების) დროინდელი ექსპონატები, საქართველოს შეიარაღებული ძალების სამშვიდობო მისიებში მონაწილეობის ამსახველი კადრები. გამოფენაზე წარმოდგენილი იყო როგორც უნიკალური ფოტო, ასევე, ვიდეო და აუდიო მასალა.
გამოფენა გახსნა ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ალექსი პეტრიაშვილმა და ნატოსა და ევროკავშირის შესახებ საინფორმაციო ცენტრის დირექტორმა ელენე გოცაძემ.
დღესვე, გაიმართა ბროშურის „საქართველო სამშვიდობო საერთაშორისო მისიებში" პრეზენტაცია.
გამოფენა ნატოსა და ევროკავშირის შესახებ საინფორმაციო ცენტრის ორგანიზებით გაიმართა და მხარდამჭერები არიან: ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატი, თავდაცვის სამინისტრო, საქართველოს ხელნაწერთა ეროვნული ცენტრი, საქართველის ეროვნული მუზეუმი, საქართველოს პარლამენტის ეროვნული ბიბლიოთეკა, საქართველოს ეროვნული არქივი, ვეტერანთა საქმეების დეპარტამენტი.
ნატოს კვირეული 16 აპრილამდე გაგრძელდება. საქართველოში ნატოს დღეები უკვე მეშვიდედ ტარდება.
კვირეულის ფარგლებში დაგეგმილია სხვადასხვა ღონისძიებები როგორც თბილისში, ასევე, საქართველოს სხვადასხვა რეგიონებში.