საქართველოს პრემიერ-მინისტრი ირაკლი ღარიბაშვილი გაეროს-ს განვითარების პროგრამის (UNDP) მუდმივ წარმომადგენელს საქართველოში ნილს სკოტს შეხვდა.
მხარეებმა საქართველოსა და გაერო-ს განვითარების პროგრამის თანამშრომლობის სფეროებზე ისაუბრეს.
პრემიერ-მინისტრმა UNDP-ის მუდმივ წარმომადგენელს ინფორმაცია მიაწოდა საქართველოს სოციალურ-ეკონომიკური განვითარების სტრატეგიაზე - „საქართველო 2020" - და აღნიშნა, რომ დოკუმენტის მიზანია კერძო სექტორის კონკურენტუნარიანობის გაზრდა, ადამიანური კაპიტალის განვითარება და ფინანსების ხელმისაწვდომობა.
ირაკლი ღარიბაშვილის განმარტებით, საქართველოს მთავრობას აღნიშნულ სფეროებში გაეროს განვითარების პროგრამასთან თანამშრომლობის იმედი აქვს.
შეხვედრაზე საქართველოს მთავრობის მეთაურმა ხაზგასმით აღნიშნა, რომ ხელისუფლების უმნიშვნელოვანეს პრიორიტეტებად რჩება ადამიანის უფლებები, ევროატლანტიკური ინტეგრაცია, საჯარო უწყებების გამჭვირვალობა და ანგარიშვალდებულება.
საქართველოს პრემიერ-მინისტრთან შეხვედრას UNDP-ის მუდმივი წარმომადგენლის მოადგილე ინიტა პაულოვიჩა დაესწრო.