8 აპრილს, 14:00 საათზე, კულტურის სამინისტროში გაიმართება ლონდონის საერთაშორისო მოდის შოუქეისის პროექტის „ძველი ქართული კოსტუმის რეკონსტრუქცია" პრეზენტაცია/ანგარიში.
პრეზენტაციაზე წარმოდგენილი იქნება International Fashion Showcase 2014 (IFS)-ის ამსახველი ფოტო და ვიდეო მასალა, ასევე საერთაშორისო მოდის კრიტიკოსთა შეფასებები.
კულტურის სამინისტროს მხარდაჭერით, თბილისის სახელმწიფო სამხატვრო აკადემიამ და მოდის დიზაინის მიმართულებამ, ბრიტანეთის მოდის საბჭოს მიწვევით, მონაწილეობა მიიღო 12-23 თებერვალს 2014 წლის საერთაშორისო მოდის შოუქეისში- International Fashion Showcase 2014 (IFS). მოდის დიზაინის მიმართულების ხელმძღვანელმა, პროფესორმა მაკა ბახტაძემ და პროექტის ინიციატორთა ჯგუფმა წარადგინა თემა „ძველი ქართული კოსტუმის რეკონსტრუქცია". პროექტი გულისხმობს ქართული იდენტობისა და კულტურული მემკვიდრეობის ერთ-ერთი მთავარი ნიშნის,- ქართული სამოსის ტრანსფორმაციას/რეკონსტრუქციას თანამედროვე კონტექსტში და წარმოადგენს უნიკალურ შანსს ახალგაზრდა დამწყები დიზაინერებისთვის, ღირსეულად წარდგნენ მსოფლიო მოდის სფეროში. კოსტიუმების, ასევე რეკონსტრუირებული ქართული სამკაულების ავტორები არიან ახალგაზრდა დამწყები დიზაინერები, მოდის დიზაინის მიმართულების სამაგისტრატურო და საბაკალავრო საფეხურების სტუდენტები და კურსდამთავრებულები.
ახალგაზრდა დიზაინერებმა მონაწილეობა მიიღეს ასევე კონკურსში, სადაც პრიზი გადაეცათ მოდის დარგში ინოვაციური დიზაინერული ნამუშევრისთვის და კურატორული მიდგომისთვის. ჯილდოს ერთ-ერთი ნომინანტი 2014 წლის საერთაშორისო მოდის შოუქეისის ქართველი მონაწილე, სოფო გონგლიაშვილიც იყო.