საქართველოს საგარეო საქმეთა მინისტრის მოადგილემ თამარ ბერუჩაშვილმა შეხვედრა გამართა ლიტვის რესპუბლიკის საგარეო საქმეთა მინისტრის მოადგილესთან ანდრიუს კრივასთან.
საგარეო უწყების ინფორმაციით, შეხვედრაზე განსაკუთრებული ყურადღება დაეთმო საქართველოს მიერ ევროპული და ევრო-ატლანტიკური ინტეგრაციის გზაზე მიღწეულ პროგრესს და ამ მიმართულებით სამომავლო თანამშრომლობის პერსპექტივებს.
ლიტვის საგარეო საქმეთა მინისტრის მოადგილემ გამოხატა ლიტვის მხარდაჭერა საქართველოსა და ევროკავშირს შორის ასოცირების შესახებ შეთანხმების მოკლე დროში ხელმოწერისა და ნატო-ს მომავალ სამიტზე საქართველოსათვის გაწევრიანების სამოქმედო გეგმის მინიჭების მიმართ.
შეხვედრის ფარგლებში საქართველოსა და ლიტვის საგარეო საქმეთა მინისტრის მოადგილეებმა ხელი მოაწერეს „ევროპული და ევრო-ატლანტიკური ინტეგრაციის საკითხებში საქართველო-ლიტვის კომისიის ფარგლებში 2014 წლის სამოქმედო გეგმას", რომელიც გულისხმობს „საქართველოსა და ლიტვას შორის ევროპულ და ევრო-ატლანტიკურ სტრუქტურებში ინტეგრაციის შესახებ ქარტიით" გათვალისწინებული დებულებების განხორციელებას.
