უშიშროების საბჭოს მდივანი ირინა იმერლიშვილი იმედს გამოთქვამს, რომ საქართველოში ევრომეიდნის სცენარი არ განმეორდება. როგორც იმერლიშვილმა შს მინისტრის ალექსანდე ჭიკაიძის განცხადების საპასუხოდ განმარტა ხელისუფლება მზადაა დაძლიოს აღნიშნული კრიზისიც.
"ამ კუთხით შს მინისტრმა გაცილებით მეტი იცის, ვინაიდან მას აქვს გაცილებით მეტი ინფორმაცია ქვეყნის შიგნით არსებულ მდგომარეობაზე, თუმცა იმედი მაქვს, მსგავსი არ გამეორდება. მე ძალიან დიდი იმედი მაქვს, რომ ეს საქართველოში არ მოხდება. ერთი მხრივ, ხელისუფლება მზადაა, დაძლიოს ეს კრიზისი, თუ ეს არის მოსალოდნელი და მეორე მხრივ, გზა ნატოსკენ, ეს არ არის არჩევანი მხოლოდ ერთი რომელიმე პოლიტიკური ძალის და საქართველოს ხელისუფლების, ეს არის ქართველი ხალხის არჩევანი და იმედი მაქვს, რომ მას წინ არაფერი დაუდგება, ვინაიდან ეს დაადასტურა როგორც რეფერენდუმმა, ასევე ბოლო არჩევნებმა, როდესაც პრორუსულმა ძალებმა მთლიანობაში 10%-ზე მეტი ვერ დააგროვეს", _განაცხადა იმერლიშვილმა.
შეგახსენებთ, რომ საქართველოს შინაგან საქმეთა მინისტრი გაზეთ „პრაიმ ტაიმთან" ექსკლუზიურ ინტერვიუში შესაძლო დესტაბილიზაციაზე საუბრობს. ალექსანდრე ჭიკაიძე აცხადებს, რომ "ნაციონალური მოძრაობა" ევრომაიდნის სცენარს ამუშავებს და არსებობს ინფორმაციები, რომ ამ მიზნით უკვე დაწყებულია საბურავების მომარაგება. ჭიკაიძე აღნიშნავს, რომ ის რაც უკრაინაში მოხდა, განაპირობა იმან, რომ იქ ხელისუფლებამ უარი თქვა დემოკრატიულ და ევროპულ ღირებულებებზე, რაც მინისტრის თქმით, საქართველოში არ შეიმჩნევა.
