„საქართველოს შეიარაღებული ძალების სამშვიდობო ოპერაციებში მონაწილეობის შესახებ" საქართველოს კანონით განსაზღვრულ საერთაშორისო ოპერაციებში ან სხვა სახის სამშვიდობო საქმიანობის განხორციელებისას გარდაცვლილი ან ამ მისიებში მიღებული ჯანმრთელობის დაზიანების გამო გარდაცვლილი საქართველოს თავდაცვის სამინისტროს მოსამსახურეების, ასევე საქართველოს ტერიტორიული მთლიანობისთვის, თავისუფლებისა და დამოუკიდებლობისათვის დაღუპული, უგზო-უკვლოდ დაკარგული და მიღებული ჭრილობების შედეგად გარდაცვლილთა ოჯახის წევრები კომპენსაციის მიღების უფლებით ისარგებლებენ.
მათი დამატებითი სოციალური უზრუნველყოფის გარანტიები აისახება ჯანმრთელობის დაცვისა და სოციალურ საკითხთა კომიტეტის მიერ საკანონმდებლო ინიციატივის წესით წარმოდგენილ კანონპროექტში „სახელმწიფო პენსიის შესახებ" საქართველოს კანონში ცვლილების შეტანის თაობაზე", რომელიც თავდაცვისა და უშიშროების კომიტეტმა დღეს განიხილა. კანონპროექტის თანახმად, აღნიშნული პირები კომპენსაციას საჯარო საქმიანობის განხორციელების პერიოდში, იმ შემთხვევაში, თუ სხვა საფუძვლითაც აქვთ კომპენსაციის მიღების უფლება, ასევე სახელმწიფო პენსიასთან ერთად მიიღებენ. „მზადდება კიდევ ერთი ცვლილება, რომლის მიხედვით, იმ პირებს, რომლებმაც 1 ივნისამდე განცხადებით მომართვა ვერ მოასწრეს, აღნიშნული პენსია ცვლილების მიღების შემდეგ აუნაზღაურდებათ", - განაცხადა კომიტეტის თავმჯდომარემ, ირაკლი სესიაშვილმა. კომიტეტის წევრებმა კანონპროექტის პლენარულ სხდომაზე განხილვას ერთხმად დაუჭირეს მხარი.
მასალის გამოყენების პირობები
