ასოციაცია მიიჩნევს, რომ ხსენებული რეკომნდაცია სახალხო დამცველისათვის უფლებამოსილების გაზრდასთან დაკავშირებით, კერძოდ მისთვის დახურული ტიპის სასჯელაღსრულების დაწესებულებებში ფოტომასალის მოგროვების უფლების მინიჭება, დადებითად უნდა შეფასდეს. უფლებამოსილების ამ კუთხით გაზრდა უზრუნველყოფს გამჭვირვალობას სასჯელაღსრულების სისტემაში და ამასთან, ზედამხედველობის ხარისხის მომატებასთან ერთად, შემცირდება თავად მსჯავრდებულთა უფლებების დარღვევის ფაქტები. სახალხო დამცველის კომპეტენციების გაფართოება, საზოგადოებას, საერთაშორისო თუ ადგილობრივ ორგანიზაციებს კიდევ ერთხელ მისცემს შესაძლებლობას შეადაროს პენიტენციალურ სისტემაში არსებული ვითარება გასული წლების მდგომარეობას.
მიუხედავად იმისა, რომ ასოციაცია მართებულად მიიჩნევს სახალხო დამცველის, როგორც კონსტიტუციური ორგანოსთვის, უფლებამოსილებების ფარგლების გაზრდას, აქვე უნდა აღინიშნოს ისიც, რომ სამართლებრივი საფუძვლების სრულყოფის გარდა, აუცილებელია ეს კომპეტენციები ფაქტობრივად განხორციელდეს და სახალხო დამცველის აპარატმა უზრუნველყოს მასზე კანონით დაკისრებული პასუხისმგებლობის სრულად, ხარვეზების გარეშე შესრულება.
ასოციაცია ამ ეტაპზე არ აფასებს სახალხო დამცველის საქმიანობას. თუმცა, უნდა აღინიშნოს, რომ საზოგადოების გარკვეულ ნაწილში არსებობს უნდობლობის განცდა სახალხო დამცველის მუშაობასთან დაკავშირებით. შესაბამისად, მოვუწოდებთ სახალხო დამცველს, ზემოხსენებული რეკომენდაციის პარალელურად, გამოიჩინოს ინიციატივა თავად ომბუდსმენის აპარატის რესურსების გაზრდასა და გაძლიერებაზე, რათა სრულად მოხდეს საქართველოს მასშტაბით ადამიანის უფლებათა დარღვევის ფაქტების დაფიქსირება და შესწავლა.
ასოციაცია, თავის მხრივ, მიმართავს საქართველოს პარლამენტს იმსჯელოს სახალხო დამცველის ინიციატივაზე და მიიღოს შესაბამისი საკანონმდებლო ცვლილებები, რომელიც ხელს პენიტენციალურ სისტემაში მეტი გამჭვირვალობის შეტანას შეუწყობს და შეამცირებს მსჯავრდებულთა უფლებების დარღვევის ფაქტებს.