საქართველო- ტუვალუს შორის დიპლომატიური და საკონსულო ურთიერთობების საკითხები და სხვადასხვა სფეროში სამომავლო თანამშრომლობის პერსპექტივები განიხილეს შეხვედრაზე, რომელიც საქართველოს პრემიერ-მინისტრ ირაკლი ღარიბაშვილსა და ტუვალუს გარემოს დაცვის, საგარეო საქმეთა, შრომის და ვაჭრობის მინისტრ ტაუკელინა ფინიკასოს შორის გაიმართა. შეხვედრაზე კმაყოფილებით აღინიშნა, რომ დღეს ხელი მოეწერა ოქმს საქართველოსა და ტუვალუს შორის დიპლომატიური და საკონსულო ურთიერთობების დამყარების შესახებ, ასევე მემორანდუმს თანამშრომლობის შესახებ.
შეხვედრისას ხაზი გაესვა თანამედროვე მსოფლიოში საერთაშორისო სამართლის პრინციპებისა და ნორმების პატივისცემის უაღრესად დიდ მნიშვნელობას. მხარეები მიესალმნენ ერთობლივ გადაწყვეტილებას, რომ ამ ნორმების სრული დაცვით განხორციელდეს ორ ქვეყანას შორის დიპლომატიური ურთიერთობების დამყარება.
ტაუკელინა ფინიკასომ დააფიქსირა ტუვალუს ერთმნიშვნელოვანი მხარდაჭერა საქართველოს სუვერენიტეტისა და ტერიტორიული მთლიანობის მიმართ, მის საერთაშორისოდ აღიარებულ საზღვრებში.
შეხვედრას ტუვალუს საგარეო საქმეთა მინისტრის მოადგილის მოვალეობის შემსრულებელი პასუნა ტუაგა, ტუვალუს საგარეო ურთიერთობებისა და პროტოკოლის დეპარტამენტის უფროსი კიალი მოლუ და საქართველოს საგარეო საქმეთა მინისტრი მაია ფანჯიკიძე დაესწრნენ.
მასალის გამოყენების პირობები
