„ქართული ოცნება - დემოკრატიული საქართველო"-ს გენერალური მდივანი კახა კალაძე საქართველოში ვიზიტად მყოფ ვროპარლამენტის ფრაქცია „სოციალისტებისა და დემოკრატების ალიანსი"-ს პრეზიდენტ ჰანეს სვობოდას შეხვდა. კახა კალაძემ სტუმარს ქვეყანაში მიმდინარე სოციალ-ეკონომიკური და ადგილობრივი თვითმმართველობის რეფორმები გააცნო და განაცხადა, რომ პარტია „ქართული ოცნება", როგორც სამთავრობო კოალიციის ყველაზე მსხვილი მონაწილე, განსაკუთრებულ პასუხისმგებლობას იღებს ქვეყანაში მიმდინარე რეფორმების განხორციელებაზე. ყურადღება გამახვილდა ადგილობრივი თვითმმართველობის არჩევნებისთვის მზადებაზე.
„ჩვენ ყველაფერს გავაკეთებთ იმისთვის, რომ ევროპის სრულუფლებიანი ქვეყანა გავხდეთ" - განაცხადა კახა კალაძემ და მიესალმა უკრაინაში მიმდინარე მოვლენების ფონზე ასოცირების ხელშეკრულების ხელმოწერის დაჩქარებას.
„ქართული ოცნება - დემოკრატიული საქართველო"-ს ოფისში გამართულ შეხვედრას ესწრებოდნენ პარტია „სოციალ-დემოკრატები საქართველოს განვითარებისათვის" თავმჯდომარე გია ჟორჟოლიანი და „ქართული ოცნება - დემოკრატიული საქართველო"-ს პოლიტიკური მდივანი არმაზ ახვლესიანი.
ევროპარლამენტის ფრაქცია „სოციალისტებისა და დემოკრატების ალიანსი" წარმოადგენს სიდიდით მეორე საპარლამენტო ჯგუფს და მის შემადგენლობაში შედის 195 დეპუტატი.
