თბილისის უფლებამოსილებაშეჩერებული მერი გიგი უგულავა დეპუტატ ნუგზარ წიკლაურზე თავდასხმასთან დაკავშირებით პრემიერ-მინისტრის ირაკლი ღარიბაშვილის განცხადებას ეხმიანება. როგორც საკითხის კომენტირებისას უგულავამ განაცხადა პრემიერ-მინისტრმა ირაკლი ღარიბაშვილმა დაუფარავად მოახდინა ნუგზარ წიკლაურის ცემის ფაქტის პოლიტიზირება.
,,მას სრულიად ცინიკურად, მაგრამ დაუფარავად მოახდინა ამ საკითხის პოლიტიზირება და შეეცადა ეს თემა კვლავ ,,ნაციონალურ მოძრაობასთან" დაპირისპირების კონტექსტში წარმოეჩინა და თქვა, რომ ეს წინა წლებში ხდებოდა როცა საქმეები არ იძიებოდა და ის პირად კონტროლზე აიყვანდა ამ გამოძიებას.. მინდა შეგახსენოთ, რომ ეს არა არის პირველი შემთხვევა როდესაც პრემიერ-მინისტრი ღარიბაშვილი აცხადებს, რომ ის ამა თუ იმ საქმის გამოძიებას პირად კონტროლზე აიყვანს. ასეთი გახდათ ერთი წლის ბავშვის ბარბარე რაფალიანცის გარდაცვალების საკითხი რომელიც ამ ადამიანმა პრესტიჟის საქმედ გამოაცხადა და ეს საქმე დღემდე გამოუძიებელია", _განაცხადა უგულავამ.
მისივე განმარტებით, თუ ნუგზარ წიკლაური ცემის ფაქტი უსწრაფესად გამოძიებული არ იქნება და დამნაშავეები არ დაისჯებიან მაშინ მომხდარზე პასუხისმგებლობა მოქმედ და ყოფილ პრემიერ-მინისტრს ირაკლი ღარიბაშვილისა და და ბიძინა ივანიშვილს დაეკისრება.
,,ამგვარი საქმეების გამოუძიებლობა ხდებოდა ნაციონალური მოძრაობის დროს. წინასწარ დასკვნის გამოტანა არ იქნება სწორი. მე ინფორმაცია მოვისმინე ამ დილით, ეს რა თქმა უნდა არის აღმაშფოთებელი. მე მოვუწოდე შესაბამის უწყებებს, რომ დროულად გამოიძიონ აღნიშნული საქმე" - განაცხადა საქართველოს პრემიერ-მინისტრმა ირაკლი ღარიბაშვილმა დეპუტატ ნუგზარ წიკლაურის ცემის ფაქტის კომენტირებისას.
შეგახსენებთ, რომ საპარლამენტო უმცირესობის წევრ ნუგზარ წიკლაურს წუხელ ფიზიკურად გაუსწორდნენ. დეპუტატის თქმით, სახლთან სამი მანქანით რამდენიმე ნიღბიანი დახვდა, რომელთაც მისი გატაცება სცადეს.
წიკლაურის თქმით, თავდამსხმელებმა ელექტროშოკიც გამოიყენეს. დეპუტატს დაზიანებები სახეზე აღენიშნება.
