საქართველოს ყოფილი პრეზიდენტი მიხეილ სააკაშვილი მზადაა, მოწმის სახით სასამართლოზე დაიკითხოს, ამის შესახებ "რუსთავი 2"-ის გადაცემა "პოზიციაში" დედაქალაქის უფლებაშეჩერებულმა მერმა, გიგი უგულავამ განაცხადა.
"მინდა გაგაცნოთ მიხეილ სააკაშვილის პოზიცია, რომელთანაც რამდენიმე საათის წინ მქონდა სატელეფონო საუბარი. კერძოდ, თუ პროკურატურის მიერ წარმოებულ ამა თუ იმ საქმეს აქვს სამართლებრივი პერსპექტივა, ბუნებრივია, ის წავა სასამართლოში შემდომი სასამართლო განხილვისთვის. პროკურატურას აქვს შესაძლებლობა, რომ მოწმის სახით დაკითხოს ნებისმიერი მოქალაქე და მათ შორის ამ ჩამონათვალში იყოს ისეთი მოწმეც, რომელიც გამოძიების პროცესში არ იყო დაკითხული. როცა საქმის არსებითი განხილვა იქნება და მოსამართლე ჩათვლის მოწმე სააკაშვილის დაკითხვის აუცილებლობას, იმ კონკრეტულ საქმეზე ჭეშმარიტების დასადგენად, რა თქმა უნდა, მიხეილ სააკაშვილი მზად არის ჩაერთოს "სკაიპით" და სასამართლოს მისცეს ჩვენება", - განაცხადა გიგი უგულავამ.
უგულავამ ასევე აღნიშნა, რომ ამჟამად ატეხილი აჟიოტაჟი პრეზიდენტთან დაკავშირებით მის პოლიტიკურ დევნას უკავშირდება.