საგარეო საქმეთა მინისიტრი მაია ფანჯიკიძე მიიჩნევს, რომ პრინციპული მნიშვნელობა არ აქვს ვინ მოაწერს საქართველოს მხრიდან ევროკავშირთან ასოცირების ხელშეკრულებას. თუმცა მინისტრი მიიჩნევს, რომ ლოგიკური იქნება, თუ ასოცირების ხელშეკრულებას ხელს, პრემიერ-მინისტრმა მოაწერს.
,,აქცენტი არის არასწორად დასმული. რა მნიშვნელობა აქვს, ვინ მოაწერს ხელს? მთავარია, რომ საქართველო მოაწერს ასოცირების ხელშეკრულებას ხელს ევროკავშირთან და ეს ძალიან წინგადადგმული ნაბიჯი იქნება, რადგანაც ეს მოუტანს საქართველოს პოლიტიკურ ასოცირებას და ეკონომიკურ ინტეგრაციას ევროკავშირთან. ეს აჟიოტაჟი რადგან ატყდა მე ასე შევაფასებდი ამ სიტუაციას, მთავრობამ იმუშავა ამ ხელშეკრულებაზე რამდენიმე წლის განმავლობაში, განსაკუთრებით ბოლო წელიწადნახევრის განმავლობაში. ჩვენი უმთავრესი პრიორიტეტი ამ ხელშეკრულების წარმატებით დასრულება იყო, რაც განხორციელდა. შესაბამისად, ამავე მთავრობამ უნდა უზრუნველყოს ყველაფრის შესრულება, რაც არის ასოცირების ხელშეკრულების შემადგენელი ნაწილი. მიმაჩნია, რომ ლოგიკური იქნება, მას ხელი მოაწეროს მთავრობის მეთაურმა, პრემიერ-მინისტრმა. ასე რომ, გაირკვევა, დადგინდება, ვინ არის უფლებამოსილი მოეწეროს ხელი ამ ხელშეკრულებას. მინდა დაგარწმუნოთ, რომ არაფერი არ მოვა წინააღმდეგობაში კონსტიტუციასთან, ყველაფერი გაკეთდება ისე, როგორც მოითხოვს კონსტიტუცია და საქართველოს შიდა კანონმდებლობა, ", - განაცხადა მაია ფანჯიკიძემ.
