შესაძლოა, 2016 წლის შემდეგ სხვა რეალობაში დავდგეთ, - აცხადებს გაზეთ "პრემიერისთვის" მიცემულ ინტერვიუში რესპუბლიკური პარტიის წევრი, პარლამენტის თავმჯდომარის მრჩეველი, დავით ზურაბიშვილი. მისი თქმით, არასაპარლამენტო პოლიტიკური ძალები თამაშგარე მდგომარეობაში ყოფნას ხელისუფლებას სულ ტყუილად ადანაშაულებენ.
"ხელისუფლება ვინმეს რამეში ხელს უშლის, ატერორებს, მოსყიდვას ახორციელებს, თუ რას აკეთებს ამნაირს? «ქართული ოცნება» ყველანაირ პარტიას აერთიანებს. დაწყებული, ვთქვათ, ჩვენისთანა ლიბერალებით, დამთავრებული «მრეწველებით», რომლის ლიდერიც ამბობს, რომ ნატო არ უნდა. პრაქტიკულად ქართული პოლიტიკური განწყობების სრული სპექტრია აქ თავმოყრილი. ეს კოალიცია თავის დროზე იმიტომ შეიქმნა, რომ «ნაციონალური მოძრაობის» დამარცხება სხვაგვარად შეუძლებელი იყო. რეალურად გამოვიდა ავტორიტეტული პიროვნება ბიძინა ივანიშვილი და გააერთიანა განსხვავებული ოპოზიციური ძალები და ეს არის დროებითი, ამ პერიოდზე გათვლილი გაერთიანება. შესაძლოა, 2016 წლის შემდეგ სხვა რეალობაში დავდგეთ, მთელი ცხოვრება 6 პარტია ერთად რომ ვერ ივლის, ეს თავისთავად ცხადია, მაგრამ თვითმმართველობის არჩევნებზე არაფერი შეიცვლება", - აცხადებს "პრემიერთან" ინტერვიუში ზურაბიშვილი და აღნიშნავს, რომ «ნაციონალური მოძრაობა» არის აქტუალური, გვინდა თუ არა, და ახლაც დაგვანახებს, რომ მას ექნება 10-15%, რაც ცოტა ნამდვილად არ არის. თან გასათვალისწინებელია, რომ «ნაცმოძრაობის» განვლილი წლებისგან მიღებული ტრავმა საზოგადოებას მოშუშებული არა აქვს და სენსიტიურად რეაგირებს ყველაფერზე.
