ეკონომიკური ურთიერთობების გაღრმავების პერსპექტივებზე და ქართული საინვესტიციო გარემოს შესახებ ისაუბრეს საქართველოს პრემიერ-მინისტრმა ირაკლი ღარიბაშვილმა და დანიის სამეფოს პრემიერ-მინისტრმა ჰელე ტორნინგ-შმიდტმა დღეს გამართულ შეხვედრაზე.
დანიის პრემიერმა საქართველოსადმი სრული მხარდაჭერა კიდევ ერთხელ დააფიქსირა.
საუბრის ძირითადი თემა საქართველოსა და დანიას შორის პოლიტიკურ-ეკონომიკური თანამშრომლობის ძირითადი ასპექტები და ურთიერთობის სფეროების გაფართოება იყო. იმსჯელეს თავდაცვის სფეროში თანამშრომლობის გაძლიერებაზე.
გამოითქვა იმედი, რომ ევროკავშირთან ასოცირებისა და თავისუფალი სავაჭრო ზონის შექმნის შესახებ შეთანხმებაზე ხელმოწერის შემდეგ, საქართველო-დანიის თანამშრომლობის სფეროები კიდევ უფრო გაფართოვდება.
ირაკლი ღარიბაშვილის თქმით, საქართველოს მთავრობა მიესალმება დანიის ახლად დანიშნული საგარეო საქმეთა მინისტრის, მარტინ ლაიდგარდის ვიზიტს თბილისში, რომელიც აპრილში შედგება.
