დღეს, 25 და ხვალ, 26 მარტს, ჟენევაში საერთაშორისო დისკუსიების 27-ე რაუნდი გაიმართება.
ჟენევის დისკუსიების 27-ე რაუნდში მონაწილეობას მიიღებს შერიგებისა და სამოქალაქო საკითხებში სახელმწიფო მინისტრის პირველი მოადგილე ქეთევან ციხელაშვილი.
ქეთევან ციხელაშვილი, რომელიც ჰუმანიტარულ საკითხებზე მომუშავე ჯგუფის ხელმძღვანელია, ჟენევაში უკვე გაემგზავრა.
"დღის წესრიგში დავაყენებთ გამყოფ ხაზზე რუსი სამხედროების მიერ მავთულხლართების გავლების საკითხს. სამწუხაროდ, მავთულხლართების გავლება სოჭის ოლიმპიური თამაშების დასრულებისთანავე განახლდა. ამ პროცესს ხაზის ორივე მხარეს მცხოვრები მოსახლეობისთვის ძალიან მძიმე შედეგები მოაქვს, იზღუდება მათი ფუნდამენტური უფლებები, მათ შორის გადაადგილების თავისუფლება. უკრაინაში მიმდინარე მოვლენების ფონზე დანარჩენი მსოფლიოსთვის უფრო ცხადი უნდა გახდეს, რომ რეგიონში კონფლიქტების მშვიდობიანი და მდგრადი მოგვარება აუცილებელია ევროპის მდგრადი სტაბილურობისა და მშვიდობისათვის", - განაცხადა ქეთევან ციხელაშვილმა.
