სახალხო დამცველი უჩა ნანუაშვილი ოფიციალური ვიზიტით ჟენევაში, ადამიანის უფლებათა დაცვისა და ხელშეწყობის ეროვნული ინსტიტუტების საერთაშორისო საკოორდინაციო კომიტეტის რიგით 27, წლიურ შეხვედრას ესწრება.
სახალხო დამცველის აპარატის ინფორმაციით, მომხსენებლები მოწვეული არიან სხვადასხვა ქვეყნებიდან: საფრანგეთი, გერმანია, ესპანეთი, ლატვია, ინდოეთი, უკრაინა, მექსიკა, მალაიზია, ნორვეგია, ფილიპინები, შოტლანდია და სხვა. სესიებზე განიხილავენ ადამიანის უფლებათა დაცვის მექანიზმებს; პრევენციის მნიშვნელობასა და როლს ადამიანის უფლებათა დაცვისა და ხელშეწყობის საქმეში; ბელგრადის პრონციპებს ადამიანის უფლებათა დაცვის ეროვნულ მექანიზმებსა და პარლამენტებს შორის ურთიერთობის შესახებ; ადამიანის უფლებათა დაცვის ეროვნულ სამოქმედო გეგმებსა და ქალთა უფლებებს. ასევე გაიმართება დისკუსია ადამიანის უფლებათა დაცვის ხელშეწყობაზე ორიენტირებულ საერთაშორისო სამოქმედო გეგმასთან დაკავშირებით. სესიაზე გაიზიარებენ სხვადასხვა გამოცდილებებს.
2013 წელს ჟენევაში გამართულ ადამიანის უფლებათა დაცვისა და ხელშეწყობის ეროვნული ინსტიტუტების საერთაშორისო საკოორდინაციო კომიტეტის 26-ე შეხვედრაზე, ადამიანის უფლებათა დაცვის ეროვნული ინსტიტუტების რეგიონული ჯგუფების შეხვედრის ფარგლებში, საქართველოს სახალხო დამცველის ინსტიტუტი ევროპის ადამიანის უფლებათა დაცვის ეროვნული ინსტიტუტების ევროპული ქსელის საკოორდინაციო კომიტეტის წევრად 3 წლის ვადით აირჩიეს.
შეხვედრა 12 მარტს დაიწყო და 14 მარტის ჩათვლით გაგრძელდება.
