თბილისის უფლებამოსილება შეჩერებული მერი გიგი უგულავა პრემიერ-მინისტრის ირაკლი ღარიბაშვილის მთავრობის დღევანდელ სხდომაზე გაკეთებულ განცხადებას ეხმიანება და მას განცხადებას უტიფრობას უწოდებს.
"ოთხი თვე ამ არსებამ და მისმა ფალავანმა შიხიაშვილმა თბილისი ბიუჯეტის გარეშე ამყოფა, რის გამოც გაჩერდა ყველაფერი და ახლა საბოტაჟზე ალაპარაკდა. რა უსაზღვროა ამ არსების უტიფრობა. მიუხედავად სამართლიანი აღშფოთებისა, მინდა მოვუწოდო თბილისის მერიას, რომ გაეშვას ამ უტიფარ ხალხს და გზების მიმდინარე შეკეთებაზე ფოკუსირდეს" _განაცახდა უგულავამ.
საქართველოს პრემიერ-მინისტრი თბილისის გზებზე არსებულ მდგომარეობას დედაქალაქის მერიის საბოტაჟად აფასებს. როგორც ღარიბაშვილმა მთავრობის დღევანდელ სხდომაზე განაცხადა, მისი ინფორმაციით, მთელი წლის განმავლობაში თბილისში არც ერთი გზა არ შეკეთებულა.
"მას შემდეგ, რაც დავით ნარმანიას თბილისის მერად ავირჩევთ, პირველი დავალება, რასაც მას თბილისელები მისცემენ, გზების დაუყოვნებლივ შეკეთების დაწყება იქნება. როგორც გავიგე, მთელი წლის განმავლობაში არც ერთი გზა არ შეკეთებულა. ეს, ალბათ შეგნებულად ხდება. სამწუხაროა, რომ მთელი წლის განმავლობაში თბილისის მერია ამას არ აკეთებდა, რაც პირდაპირ საბოტაჟია. ეს დღესაც გრძელდება, ასე რომ, ბატონო დავით, ბევრი საქმე გექნებათ", - მიმართა პრემიერმა დავით ნარმანიას მთავრობის დღევანდელ სხდომაზე.
