პრემიერ-მინისტრ ირაკლი ღარიბაშვილის ხელმძღვანელობით, დღეს მთავრობის ადმინისტრაციაში ათასწლეულის გამოწვევის ფონდი-საქართველოს სამეთვალყურეო საბჭოს სხდომა გაიმართა. საბჭოს წევრებმა 2013 წელს ჩატარებული საქმიანობის ანგარიში განიხილეს და კომპაქტის ძალაში შესვლისთვის გაწეულ სამუშაოებს გაეცნენ. სხდომაზე ასევე იმსჯელეს საქართველოს უმაღლესი განათლების სფეროში შესაძლებლობების გაძლიერების, ზუსტი, საბუნებისმეტყველო და საინჟინრო მეცნიერებათა საბაკალავრო პროგრამების დანერგვისთვის პარტნიორი უნივერსიტეტების შერჩევის მიზნით განხორციელებულ საერთაშორისო ტენდერის შედეგებზე. ტენდერის მიზანია აშშ-სა და საქართველოს სახელმწიფო უნივერსიტეტებისგან შემდგარი კონსორციუმის გამოვლენა, რომელიც საქართველოში განახორციელებს საბაკალავრო პროგრამებს. აღნიშნული უნიკალური საგანმანათლებლო პროექტის განხორციელების შედეგად, კურსდამთავრებულები მიიღებენ ამერიკულ დიპლომებს საინჟინრო სპეციალობებში, ტექნოლოგიებსა და საბუნებისმეტყველო მეცნიერებებში.
აშშ-ის ათასწლეულის გამოწვევის კორპორაციამ საქართველოს გამოუყო 140 მილიონი დოლარი. კომპაქტით საქართველოში იგეგმება ზოგადი, უმაღლესი და პროფესიული განათლების პროგრამების განხორციელება. უმაღლესი განათლების პროექტის განხორციელებისთვის მეორე კომპაქტის ფარგლებში დაგეგმილია 30 მილიონი აშშ დოლარის გრანტის გაცემა.
ათასწლეულის გამოწვევის ფონდი - საქართველომ გამოაცხადა ტენდერი „პარტნიორი ინსტიტუტების შერჩევა მეცნიერების, ტექნოლოგიების, საინჟინრო და მათემატიკის უმაღლესი განათლების საბაკალავრო პროგრამების შემუშავებისთვის". ამჟამად, მიმდინარეობს კონკურსის ბოლო ეტაპი, რომლის დროსაც განათლების სფეროს საერთაშორისო, დამოუკიდებელი მკვლევრებისგან შემდგარი კომისია კონკურსში გამარჯვებულ ფინალისტს შეარჩევს. კონკურსში მონაწილეობას იღებს ორი კონსორციუმი. ესენია - სან დიეგოს უნივერსიტეტისა და საქართველოს სახელმწიფო უნივერსიტეტების კონსორციუმი; და ჩრდილოეთ კაროლინას უნივერსიტეტის, ობურნის უნივერსიტეტისა და საქართველოს სახელმწიფო უნივერსიტეტების კონსორციუმი.
