,,ქართული ოცნება" გარდაბანში მომხდარ ინცინდენტთან დაკავშირებით განცხადებას ავრცელებს, რომელსაც ,,ჯი-ეიჩ-ენი" უცვლელად გთავაზობთ: ,,სულ ცოტა ხნის წინ პარტია ,,ქართული ოცნება - დემოკრატიული საქართველოს" თავმჯდომარემ, ირაკლი ღარიბაშვილმა და პარტიის გენერალურმა მდივანმა, კახა კალაძემ საზოგადოებას საგანგებოდ მიმართეს და პარტიისა და მისი სტრუქტურების განახლების ახალ ეტაპზე გადასვლა გამოაცხადეს. პარტიამ ახალი ძალით დაიწყო მუშაობა, რამდენიმე რეგიონში უკვე ჩაატარა პარტიული კონფერენციები, შეხვდა პარტიის წევრებს, აქტივისტებსა და მხარდამჭერებს, რომლებიც შეხვედრებში აქტიურად იღებენ მონაწილეობას და პარტიის განახლებასა და გაძლიერებაში თავისი წვლილი შეაქვთ. ამ ვითარებაში სრულიად მიუღებელია ის, რაც გარდაბანში მოხდა. პარტიის ზოგიერთმა წევრმა, მხარდამჭერმა თუ ნებისმიერმა სხვა პირმა ,,ქართული ოცნება - დემოკრატიული საქართველოს" სახელით ისარგებლა და თავისი დესტრუქციული და პროვოკაციული მოქმედებით პარტიის ავტორიტეტსა და ინტერესებს ზიანი მიაყენა. ამ ადამიანების ასეთი მოქმედება სერიოზულ ეჭვებს ბადებს - თუ ისინი პარტიის ნამდვილი გულშემატკივრები არიან, რატომ აძლევენ ოპონენტებს იმის შესაძლებლობას, რომ მათ თავი დაჩაგრულად წარმოაჩინონ. პირდაპირ ვაცხადებთ, რომ ფიზიკური დაპირისპირება და ანგარიშსწორება კატეგორიულად ეწინააღმდეგება პარტიის გაცხადებულ პოლიტიკას. ჩვენ ამას არ დავუშვებთ. თუ დადგინდა, რომ მომხდარში მონაწილე პირები ნამდვილად პარტია ,,ქართული ოცნება - დემოკრატიული საქართველოს" წევრები არიან, ჩვენ აუცილებლად მოვახდენთ შესაბამის, უმკაცრეს რეაგირებას",-ნათქვამია პარტიის მიერ გავრცელებულ განცხადებაში.
