გიგი უგულავა თბილისის მერის არჩევნებში კენჭისყრას არ აპირებს და "ნაციონალური მოძრაობის" საარჩევნო შტაბს უხელმძღვანელებს, - ამის შესახებ უგულავამ "ნაციონალური მოძრაობის" თბილისის ორგანიზაციის ყრილობაზე გამოსვლისას განაცხადა.
უგულავას თქმით, ამ დრომდე, პრაიმერში ორი კანდიდატი - გიორგი ვაშაძე და ნიკა მელია არიან დარეგისტრირებული და პარტიის მერობის კანდიდატს სწორედ პრაიმერი გამოავლენს.
"მთავრობას გამოუცდელი, შეუფერებელი და ბევრისთვის შეურაცხმყოფელი კანდიდატი ჰყავს. შესაბამისად, ჩემი გამარჯვება ლოგიკური და რეალურია, მაგრამ თბილისის მერობაზე არ ვიყრი კენჭს, რადგან ღრმად მწამს, რომ ერთი და იგივე ადამიანი არ უნდა იყოს ერთ პოსტზე მიჯაჭვული. 10 წელი საკმარისია, ყველაფერს სჭირდება განახლება, ახალი სისხლი და ახალი თვალი. "ნაციონალური მოძრაობის" პრაიმერის მონაწილე ორივე კანდიდატს ვენდობი, ორივე ენერგიულ, გამბედავ და პრინციპულ ადამიანად მიმაჩნია და როგორიც არ უნდა იყოს არჩევანი, მე მზად ვარ, მათთან ერთად ვიბრძოლო გამარჯვებისთვის", - განაცხადა უგულავამ.
