"ახალგაზრდა კონსტიტუციონალისტთა ასოციაციის" წევრმა ნინო ქაშაკაშვილმა განაცხადა, რომ ქვეყანაში ბავშვთა ქონებრივი უფლებების დაცვისთვის მყარი საკანონმდებლო გარანტიები არ არსებობს.
„საქართველოს ახალგაზრდა კონსტიტუციონალისტთა ასოციაცია", როგორც ადამიანის უფლებების დაცვის საკითხებზე მომუშავე არასამთავრობო ორგანიზაცია, ყურადღებას ამახვილებს რამდენიმე წლის წინ ხაშურში დაფიქსირებულ ფაქტზე, რომელმაც ბავშვის უფლების შეზღუდვა გამოიწვია. ორგანიზაციამ აღნიშნულთან საკითხთან დაკავშირებით წერილობით მიმართა საქართველოში აკრედიტებულ დიპლომატიურ კორპუსს და იმედოვნებს, რომ დიპლომატები სათანადო რეაგირებას მოახდენენ.
საქმის ფაქტობრივი გარემოებების შესწავლის შედეგად დგინდება, რომ 2009 წლის 4 ნოემბერსა და 2010 წლის 22 მარტს იმედა კახურაშვილმა (მცირეწლოვანი გიორგი კახურაშვილის მამა) სს მიკროსაფინანსო ორგანიზაცია „ჯორჯიან კაპიტალიდან" ორ ეტაპად გამოიტანა კრედიტი. სესხის უზრუნველყოფის საგანი შეთანხმების შესაბამისად იყო მცირეწლოვან გიორგი კახურაშვილის საკუთრებაში არსებული (იმ დროისთვის 5 წლის) უძრავი ქონება. ამრიგად, იპოთეკით დაიტვირთა მცირეწლოვან გიორგი კახურაშვილის კუთვნილი ქონება. იმედა კახურაშვილმა სასესხო ხელშეკრულებით ნაკისრი ვალდებულებები ვერ შეასრულა. მხარეებს შორის წარმოშობილი დავა სასამართლომ განიხილა და მხარეები მორიგდნენ, თუმცა იმედა კახურაშვილმა ვერც ამ შეთანხმებით გათვალისწინებული პირობების შესრულება შეძლო. შედეგად, აღსრულების ეროვნულმა ბიურომ, სასამართლოს გადაწყვეტილების შესაბამისად, აუქციონის წესით გაყიდა მცირეწლოვანის ქონება. დღეს არასრულწლოვანს აღარ გააჩნია კუთვნილი ქონება, რომელიც მისი განვითარებისათვის მინიმუმ აუცილებელ პირობებს ქმნიდა.
საქართველოს იუსტიციის სამინისტროში შემავალი აღსრულების ეროვნული ბიუროს აღსრულების პოლიციელი საქართველოს კანონმდებლობის შესაბამისად უფლებამოსილია მოახდინოს ოჯახის გამოსახლება. იქიდან გამომდინარე, რომ მცირეწლოვანი გიორგი კახურაშვილი აწ უკვე რეალიზებულ სახლში ცხოვრობს, არ ხდება ოჯახის გამოსახლება. გასათვალისწინებელია, რომ ნეიროფსიქოლოგიური დასკვნის შესაბამისად, ბავშვის ჯანმრთელობის მდგომარეობა გაუარესებულია. კერძოდ, გიორგი კახურაშვილს ნეიროფსიქოლოგიური რეაბილიტაცია და სენსორულ ოთახში ვარჯიში ესაჭიროება. ასევე აუცილებელი მშვიდი და მოწესრიგებული გარემო მცირეწლოვანის მდგომარეობის გასაუმჯობესებლად.
ზემოთქმულის გათვალისწინებით, შეიძლება ითქვას, რომ არასრულწლოვლოვანის ჭეშმარიტი ინტერესების ჯეროვნად უზრუნველყოფა ვერ ხერხდება, რაც გაეროს ბავშვთა უფლებების კონვენციის მე-3 მუხლის პირველი პუნქტითაა გათვალისწინებული. აღსანიშნავია, რომ ამ შემთხვევასთან დაკავშირებით ინფორმირებულები არიან საქართველოს სახალხო დამცველის აპარატი, საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტი, რომელებმაც შესაბამის უწყებებს მოუწოდეს გაეთვალისწინებინათ ბავშვის ჭეშმარიტი ინტერესები.
"ჩვენ ვთვლით, რომ აუცილებელია კანონმდებლობის დახვეწა და დამატებითი მექანიზმების შემოღება, რათა ბავშვთა ქონებრივი უფლებები ქვეყანაში მაქსიმალურად იქნეს დაცული. აუცილებლად მიგვაჩნია შეიქმნას მექანიზმი, რომლის საშუალებითაც არასრულწლოვანთა საკუთრებაზე ზემოქმედება მხოლოდ მათი ინტერესების გათვალისწინებით მოხდება"- განაცხადა ქაშაკაშვილმა და დასძინა, რომ ორაგნიზაცია საკანონმდებლო წინადადების მომზადებას გეგმავს.