„მარგებელი ჰოლდინგი" საერთაშორისო გამოფენაზე „Gulfood 2014" მონაწილეობს. გამოფენაზე წარმოდგენილია ჰოლდინგში შემავალი კომპანიების „მარნეულის სასურსათო ქარხნისა" და „წყალი მარგებელის" პროდუქცია.
Gulfood-ი კვების მრეწველობის სფეროში უმსხვილესი გამოფენაა, რომელიც ყოველწლიურად 5 დღის განმავლობაში იმართება არაბეთის გაერთიანებულ საემიროებში. გამოფენაზე წარმოდგენილია მსოფლიოს სხვადასხვა ქვეყნის 4500-ზე მეტი კომპანიის 20 000 ბრენდი, ხოლო დამთვალიერებელთა რაოდენობა 80 000-ს აღწევს. გამოფენა 23 თებერვალს გაიხსნა და 27 თებერვლამდე გრძელდება.
„ჩვენი კომპანიები წელს პირველად ესწრებიან გამოფენას საკუთარი სტენდით, სადაც დაინტერესებულ დამთვალიერებლებს საშუალება აქვთ გაეცნონ და დააგემოვნონ მარნეულისა და წყალი მარგებლის პროდუქცია. გამოფენა წარმატებული გამოდგა, როგორც მარნეულის სასურსათო ქარხნისთვის ასევე წყალი მარგებლისთვის, შეხვედრები იმართება მსხვილ სავაჭრო ქსელებთან და საერთაშორისო სადისტრიბუციო კომპანიებთან, " - აღნიშნავს „მარნეულიs სასურსათო ქარხნის" დირექტორი ირინა გაფრინდაშვილი.
„მარნეულის სასურსათო ქარხანა" „მარგებელი ჰოლდინგის" ნაწილია, რომელიც 2007 წელს დაარსდა და საქართველოში ერთ-ერთი უმსხვილესი საწარმოა. ქარხანა, რომელიც ევროპული სტანდარტების მქონე დანადგარებითაა აღჭურვილი, 50-ზე მეტი დასახელების ქართული ნედლეულისგან დამზადებულ, ნატურალურ და გემრიელ საკონსერვო პროდუქტს უშვებს. ქარხანას ნედლეულით ჰოლდინგში შემავალი კომპანია „მარნეული აგრო" და ადგილობრივი მცირე სასოფლო მეურნეობები ამარაგებენ. საწარმოს ტექნიკური შესაძლებლობა, ადგილობრივი ნედლეულის მაღალ ხარისხთან ერთად, ქართულ ბაზარზე უალტერნატივო პროდუქტს სთავაზობს. ქილაში ჩადებული თითოეული პროდუქტი ქართულ მიწაზეა მოყვანილი და 100 პროცენტით ქართულია. შესაბამისად, M ნიშანი საქართველოში ხარისხისა და ჯანსაღი საკვების სინონიმად იქცა.