დღეს, თბილისში საქართველოსა და ევროკავშირს შორის დაიწყო მოლაპარაკებები საქართველოს ენერგოთანამეგობრობაში გაწევრიანების შესახებ. მოლაპარაკებების დაწყებას ესწრებოდნენ ენერგეტიკის სფეროს ევროკომისარი გიუნტერ ოტინგერი, საქარველოს პრემიერ-მინისტრი ირაკლი ღარიბაშვილი და ვიცე-პრემიერი და ენერგეტიკის მინისტრი კახა კალაძე. ენერგოთანამეგობრობაში გაწევრიანებისა და ენერგეტიკის სფეროში ევროკავშირის კანონმდებლობის განხორციელების შემდეგ, საქართველოს ექნება უფრო მჭიდრო კავშირები ევროკავშირის ერთიან ენერგობაზართან, ეს კი გამოიწვევს ინვესტიციების მოზიდვას და ენერგეტიკის სექტორის ფინანსური მდგრადობის გაზრდას.
ენერგოკომისარმა გიუნტერ ოტინგერმა განაცხადა:"დღევანდელი მოლაპარაკებები არის საქართველოს მიერ გადადგმული ნაბიჯი ევროკავშირთან რეგიონული ინტეგრაციისა და ენერგეტიკის სფეროში აქტიური თანამშრომლობის გზაზე. ენერგოთანამეგობრობაში გაწევრიანება ხელს შეუწყობს საქართველოში ინვესტიციების მოზიდვას, ასევე, საქართველოს მოქალაქებისა და ბიზნესის და ევროკავშირთან დააახლოებას."
ენერგოთანამეგობრობის სამდივნოს დირექტორმა იანეშ კოპაჩმა თქვა: ,,ძალზე მოხარული ვარ, რომ საქარველო ენერგოთანამეგობრობის ოჯახის სრული წევრი გახდება. ენერგოთანამეგობრობამ დაამტკიცა, რომ მისი წევრობა ენერგოსექტორში რეფორმების მხარდაჭერისა და ინვესტიციების ხელშეწყობის ეფექტიანი საშუალებაა. მოლაპარაკებების დაწყება არის მნიშვნელოვანი სიგნალი იმისა, რომ საქართველო ენერგობაზრის მდგრადი განვითარების გზას ადგას."
საქართველოსა და ევროკავშირის მხრიდან მოლაპარაკებებში ჩართულმა გუნდებმა ისაუბრეს იმ განრიგზე, რომლის მიხედვითაც საქართველო დანერგავს და შეასრულებს ევროკავშირის წესებს ელექტროენერგიისა და გაზის ქსელების, გარემოს დაცვის, განახლებადი ენერგიების, ენერგოეფექტურობის, ნავთობისა და ენერგოსტატისტიკის სფეროებში.
მოლაპარაკებების შემდეგი რაუნდი ბრიუსელში, 2014 წლის 19 მარტს გაიმართება.
ენერგოთანამეგობრობის მხარეები არიან ევროკავშირი და სამხრეთ აღმოსავლეთ ევროპისა და შავი ზღვის აუზის რვა ქვეყანა, ესენია: ალბანეთი, ბოსნია და ჰერცეგოვინა, კოსოვო, იუგოსლავიის ყოფილი რესპუბლიკა მაკედონია, მოლდოვის რესპუბლიკა, მონტენეგრო, სერბია და უკრაინა. დღეისათვის ევროთანამეგობრობაში დამკვირვებლების სტატუსით სარგებლობენ საქართველო, სომხეთი, ნორვეგია და თურქეთი.
ენერგოთანამეგობრობის მიზანია, საშუალოვადიან პერსპექტივაში რეგიონის მასშტაბით შექმნას ინტეგრირებული ენერგობაზარი, რომელიც შესაძლებლობას მისცემს წევრებს აწარმოონ ტრანსსასაზღვრო ვაჭრობა, ჰქონდეთ გარანტირებული ენერგომიწოდება და გაითვალისწინონ კლიმატისა და სოციალურ სფეროებთან დაკავშირებული პრობლემები.
