პრეზიდენტ გიორგი მარგველაშვილის განცხადებით, სამხედრო კომიტეტის ვიზიტი ალიანსის მხრიდან საქართველოს მტკიცე მხარდაჭერას ადასტურებს. ამის შესახებ, მარგველაშვილმა ნატო-ს სამხედრო კომიტეტის თავმჯდომარემ, კნუდ ბარტელსთან შეხვედრის შემდეგ განაცხადა.
,,ვისაუბრეთ საქართველოსა და ნატოს დაახლოების ფორმატებზე და ხაზი გაესვა ამ სფეროში მიღწეულ პროგრესს. საქართველო ადასტურებს მზადყოფნას, წვლილი შეიტანოს საერთაშორისო უსაფრთხოებაში და ჩვენი ორი ბატალიონი განაგრძობს ავღანეთში სამსახურს "აისაფის", ავღანეთიდან გამოსვლის ოპერაციაში და სთავაზობს ალიანსს საკუთარ ინფრასტრუქტურას. ასევე მინდა გამოვთქვა მადლიერება საქართველოს ნატოს სწრაფი რეაგირების ძალებში ჩართვის მხარდაჭერისთვის. იმედი მაქვს, საქართველო სათანადო შეფასებას მიიღებს 2014 წლის სამიტზე დიდ ბრიტანეთში, რაც ჩვენს თანამშრომლობას ახალ ეტაპზე გადაიყვანს", - აღნიშნა გიორგი მარგველაშვილმა.
