იუსტიციის სამინისტროს საჯარო რეესტრის საქმისწარმოების ელექტრონულ პროგრამაში ეკონომიკისა და მდგრადი განვითარების სამინისტროს საზღვაო ტრანსპორტის სააგენტო ჩაერთო.
საქმისწარმოების ელექტრონული პროგრამის ამოქმედების შემდეგ, საზღვაო ტრანსპორტის სააგენტოში ყველა სახის კორესპონდენცია ელექტრონულად იმოძრავებს, რაც ადრესატამდე დოკუმენტების ოპერატიულად მიწოდებას, მათ დამუშავებას, რეაგირებას და კონტროლს მნიშვნელოვნად გაამარტივებს.
საქმისწარმოების ელექტრონული პროგრამის საშუალებით საზღვაო ტრანსპორტის სააგენტოსა და ელექტრონულ პროგრამაში ჩართულ სხვა საჯარო უწყებებს შორის ურთიერთობა მნიშვნელოვნად გამარტივდება. დოკუმენტების ელექტრონული მიმოცვლა დაზოგავს დროსა და მატერიალურ ხარჯებს.
საჯარო რეესტრის ეროვნულ სააგენტოში საქმისწარმოების ელექტრონული პროგრამა 2007 წელს შეიქმნა. 2010 წლიდან მისი დანერგვა სხვადასხვა სახელმწიფო უწყებებში დაიწყო. დღეისათვის აღნიშნული პროგრამა წარმატებით ფუნქციონირებს 30-მდე სახელმწიფო ორგანიზაციაში.
