ბადრი პატარკაციშვილის საარჩევნო შტაბი საგანგებო 2007 წელს გაწეული საქმიანობისთვის გასამრჯელოს ითხოვს. განცხადებას ბადრო პატარკაციშვილის საარჩევნო შტაბის ყოფილი ხელმძღვანელმა ვალერი გელბახიანა გაავრცელა.
განცხადებას უცვლელად გთავაზობთ:
2007 წლის ნოემბერში დაინიშნა ვადამდელი საპრეზიდენტო არჩევნები და ბადრი პატარკაციშვილი დასახელდა პრეზიდენტობის კანდიდატად. შეიქმნა მისი მხარდამჭერი საარჩევნო შტაბი. საპრეზიდენტო მარათონი ყოველდღიური პროვოკაციების,დაჭერების და ფიზიკური განადგურების მუქარების ფონზე მიმდინარეობდა . 2007 წლის 2 ნოემბერს ბადრი პატარკაციშვილის წინააღმდეგ სახელმწიფო ხელისუფლების დამხობისაკენ მოწოდების მუხლით სისხლის სამართლის საქმე აღიძრა, მოხდა 7 ნოემბრის მშვიდობიანი მანიფესტაციის დარბევა და შეჭრა ტელეკომპანია"იმედში". ტელევიზიის დარბევას მოყვა უსაფრთხოების სამსახურის თანამშრომლების დაკავება,რომელთაც ბრალი დაედოთ უკანონო შეიარაღებული ფორმირების შექმნასა და იარაღის უკანონო შეძენაში. საარჩევნო შტაბში შავი ფულის შეტანის ბრალდებით 7 პირი დააკავეს, არჩევნების დასრულების შემდეგ რაიონული და საქალაქო შტაბების 40 ზე მეტი ხელმძღვანელი დააპატიმრეს, უამრავ ადამიანს წაართვეს ქონება,მძიმე ფიზიკური და ფსიქოლოგიური ზეწოლის შედეგად 2 პირი გარდაიცვალა.
საარჩევნო კამპანიაში 48 ათასი აქტივისტი ოფიციალურად მონაწილეობდა (შტაბის უფროსები, ოფისების თანამშრომლები, საარჩევნო უბნების კოორდინატორები და მიკროუბნის კოორდინატორები და ა.შ.) საბანკო ანგარიშების დაყადაღების გამო საარჩევნო შტაბს დარჩა გასასტუმრებელი, სახელფასო დავალიანება, სარეკლამო მასალების, საოფისე და საწვავის ხარჯები, ოფისების იჯარის დავალიანება . 2007 წელს „კორსტანდარტ ბანკში „ ბადრი პატარკაციშვილის მიერ მიზნობრივი დანიშნულებით ჩარიცხული იქნა 8 მილიონი დოლარი, რომელიც განკუთვნილი იყო აღნიშნული დავალიანებების გასასტუმრებლად. მაგრამ სისხლის სამართლის საქმის აღძვრის გამო ხელისუფლებამ აღნიშნულ თანხას ყადაღა დაადო და მისი ჩარიცხვა საარჩევნო ფონდის ანგარიშზე ვეღარ მოხერხდა. თანხის მოთხოვნით აქციებიც გაიმართა, განსვენებული ბადრი პატარკაციშვილის ოჯახმა გააკეთა საჯარო განცხადება, რომ აღიარებდა ამ ვალს და ყადაღის მოხსნისთანავე ყველა დავალიანება გასტუმრებული იქნებოდა. 2012 წელს,აღნიშნულ საკითხზე შედგა კომუნიკაცია ჯერ გარდაცვლილის დედასთან, შემდგომ ინა გუდავაძის ბიზნეს პარტნიორ ირაკლი რუხაძესთან, ამის შემდეგ საქმეში ჩაერთო ბატონი ხუხაშვილი, პრემიერის ყოფილი მრჩევლის გია ხუხაშვილის გამოჩენას მოყვა ოჯახთან კომუნიკაციის გაწყვეტა და მოთხოვნის სრული იგნორირება.
ბადრი პატარკაციშვილის საარჩევნო შტაბი გარდაცვლილის ღირსების დასაცავად ყურადღებისა და რეაგირების მიღმა ტოვებს მიხეილ სააკაშვილთან ბადრი პატარკაციშვილის ოჯახის არასახარბიელო გარიგებას . ვთავაზობთ განსვენებულის ოჯახს კეთილსინდისიერად შეასრულოს ის ვალდებულება რომელიც მათ საარჩევნო კამპანიაში დასაქმებული ადამიანების წინაშე გააჩნიათ. წინააღმდეგ შემთხვევაში საარჩევნო შტაბი იხსნის ყოველგვარ მორალურ პასუხისმგებლობას და გამოთქვამს მზადყოფნას, საკითხს მისცეს იურიდიული დანიშნულება და ვალდებულების აღსრულება დაიწყოს სასამართლოში დავის კანონიერი საშუალებით.