თბილისის საკრებულოს ფრაქცია „ქართული ოცნება - თბილისელები" დედაქალაქის მერიას დაუმთავრებელი საცხოვრებელი კორპუსების დასრულებისათვის ბიუჯეტში შესაბამისი თანხის გათვალისწინებას სთხოვს.
როგორც გულიკო ზუმბაძემ დღეს გამართულ ბრიფინგზე განაცხადა, ქვეყანაში საბინაო პრობლემები სულ უფრო და უფრო მწვავე ხასიათს იღებს და ხელისუფლების მხრიდან წლების განმავლობაში უპასუხისმგებლო და გულგრილმა დამოკიდებულებამ ვითარება კიდევ უფრო დაამძიმა.
აღნიშნული მოთხოვნებით ფრაქციამ ოფიციალურად უკვე მიმართა თბილისის მერის მოვალეობის შემსრულებელს სევდია უგრეხელიძეს, კერძოდ: გულიკო ზუმბაძე მერიას სთხოვს, გათვალისწინებული იქნას ქ. თბილისის მერიის ვალდებულების შესრულება დაუმთავრებელი საცხოვრებელი კორპუსების დასასრულებლად და მეორე,
გათვალისწინებული იქნას სახელმწიფოს შიდა ვალად აღიარებული იმ კოოპერატიული საცხოვრებელი შენობების დასრულებაც, რომლებიც 2005 წელს მერიას ბიუჯეტში ჰქონდა გათვალისწინებული და არ შესრულებულა.
ფრაქციის თავმჯდომარის განცხადებით ამ მიზნისათვის, ამ ეტაპზე, საჭირო იქნება დაახლოებით 10 მილიონი ლარის გამოყოფა.
"იმის გათვალისწინებით, რომ დღევანდელი მდგომარეობით შეზღუდული რესურსი გაგვაჩნია და საბინაო პრობლემასთან დაკავშირებით არც ერთიანი პოლიტიკაა ჩამოყალიბებული, ვფიქრობთ, რომ აღნიშნული ღონისძიებები ხელს შეუწყობს ამ უსერიოზულესი პრობლემის დაძლევის მიმართულებით პროცესის დაწყებას, როგორც ადგილობრივ, ისე ცენტრალური ხელისუფლების დონეზე",- განაცხადა გულიკო ზუმბაძემ.
ფრაქცია „ქართული ოცნება - თბილისელების" თავმჯდომარემ 4-5 თებერვალს ჟენევაში გაეროს ეკონომიკური კომისიის მიერ გამართულ სემინარზეც ისაუბრა, რომელიც ადამიანის მიერ საცხოვრისზე ხელმისაწვდომობის თემას მიეძღვნა.
გულიკო ზუმბაძის განცხადებით, სულ მალე საქართველოს წინაშე გაჩნდება მოთხოვნა, დაიწყოს თანმიმდევრული პოლიტიკის განხორციელება უბინაო მოქალაქეებისათვის სოცილურ საცხოვრისზე ხელმისაწვდომობისა და ნორმალური პირობების უზრუნველსაყოფად.
"ჩვენ ამისთვის უნდა დავიწყოთ შესაბამისი კონცეფციის შემუშავება, კონკრეტული და ქმედითი ნაბიჯების გადადგმა'',- განაცხადა გულიკო ზუმბაძემ.