11 თებერვალს საჯარო რეესტრის ეროვნულ სააგენტოს სამუშაო ვიზიტით თურქული კომპანია ,,NetCad"-ის ექსპერტები ეწვივნენ, რომლებმაც სააგენტოს თანამშრომლებს კადასტრის, კარტოგრაფიის, სივრცითი დაგეგმარების, სოფლის მეურნეობის, სამთო მრეწველობის, საინჟინრო გეოლოგიის დარგებში კომპანიის წარმოებული პროდუქტები გააცნეს. ,,NetCad"-ი ერთ-ერთი ცნობილი გეოინფორმაციული ტექნოლოგიების მწარმოებელი კომპანიაა მსოფლიოში.
ამჟამად საკადასტრო მონაცემების დამუშავებისთვის საჯარო რეესტრის ეროვნული სააგენტო კომპანია „ESRI"-ის გეოინფორმაციულ პროდუქციას იყენებს. მისი განახლება 2007 წლის შემდეგ არ მომხდარა. დღეისათვის არსებული პროდუქტი სააგენტოს მოთხოვნებს სრულად ვერ პასუხობს და სამუშაო პროცესში ისეთი სახის პრობლემებს იწვევს, როგორიცაა სისტემის არამდგრადობა, უსაფრთხოების დაბალი დონე, მომხმარებელთა სუსტი მხარდაჭერა, მაღალი ფასი და სხვ.
სწორედ ამ პრობლემების მოგვარების მიზნით, სააგენტო გეგმავს სისტემის გაუმჯობესებას და უფრო მდგრადი, მაღალი წარმადობის ახალ პლატფორმაზე გადასვლას, რაც ხელს შეუწყობს ვებმომსახურების განვითარებასა და ინფორმაციის ,,ონლაინ" რეჟიმში გაცემის გამარტივებას.
მსგავსი შეხვედრები სააგენტოს საკადასტრო პროგრამული უზრუნველყოფისთვის ოპტიმალური პლატფორმის შერჩევაში დაეხმარება.
თურქი სპეციალისტების ვიზიტი 12 თებერვალს დასრულდება.