საკრებულოს სარევიზიო კომისიის თავმჯდომარემ მიხეილ ქავთარაძემ საკრებულოში გამართულ ბრიფინგზე მერიის მიერ უკანონოდ ჩატარებულ აუქციონზე ისაუბრა.
მიხეილ ქავთარაძის განმარტებით, 2013 წლის მაისში ქ. თბილისის ქონების მართვის სააგენტომ ჩაატარა აუქციონი, რომელიც თბილისში შეგროვებული არასორტირებული ნაგვის მასის გასხვისებას ითვალისწინებდა, თუმცა აუქციონი ჩაიშალა იმ მიზეზით, რომ გამარჯვებულმა პირმა თავისი ვალდებულებები არ შეასრულა.
ხელმეორედ აღნიშნულ მომსახურებაზე აუქციონი აღარ ჩატარებულა.
"2014 წლის 7 თებერვალს გაიმართა ქ. თბილისის მთავრობის სხდომა, სადაც მიღებული იქნა გადაწყვეტილება, რომ თბილისის მთავრობამ უფლებამოსილება მიანიჭა თბილისის მერის მოადგილეს, ირაკლი აბესაძეს თბილისის მთავრობის სახელით ერთპიროვნულად, ყოველგვარი კონკურენციისა და აუქციონის გარეშე გააფორმოს ხელშეკრულება ერთ-ერთ კომპანიასთან, რომელმაც დედაქალაქში მყარი საყოფაცხოვრებო ნარჩენების შეგროვება, ტრანსპორტირება, გადამუშავება უნდა განახორციელოს'',-განაცხადა მიხეილ ქავთარაძემ.
მისი თქმით, სარევიზიო კომისია საკითხთან დაკავშირებით მოკვლევას აგრძელებს, რომლის შედეგებიც ფართო საზოგადოებისთვის ცნობილი გახდება.
"არსებობს საფუძვლიანი ეჭვი, რომ ამ შემთხვევაში საქმე გვაქვს კორუფციულ გარიგებასთან. მინდა გითხრათ, რომ მსგავსი ტიპის თემებზე მთავრობის გადაწყვეტილებები მე პირადად არ მახსენდება, რამდენადაც ეს პროცესი ყოველთვის მიმდინარეობდა ტენდერის ფარგლებში და იყო კანონთან შესაბამისობაში. როცა მსგავსი მასშტაბის ღონისძიება ამ სახით, ტენდერისა და აუქციონის გარეშე ხორციელდება, საქმე გვაქვს აშკარა კანონდარღვევასთან'',-მიიჩნევს ქავთარაძე.
საკრებულოში გამართულ პრესკონფერენციას ''შპს'' "გეოინტექსის'' დირექტორი კონსტანტინე ხუჭუაც ესწრებოდა, რომლის კომპანიამ ზემოთხსენებულ აუქციონში მიიღო მონაწილეობა.
"აუქციონში მონაწილეობა რამდენიმე კომპანიამ მიიღო, თუმცა მას შემდეგ, რაც ერთ-ერთმა მათგანმა სრულიად აბსურდული ფასი დააფიქსირა, აუქციონი ჩაშლილად გამოცხადდა.
რაც შეეხება ხელახალ აუქციონს, მივიღე ინფორმაცია, რომ მის გამოცხადებას შესაბამისი ვებ-გვერდის საშუალებით დავლოდებოდი, თუმცა არანაირი აუქციონი აღარ გამოცხადებულა.
მერიის ერთ-ერთი მაღალჩინოსანი ირაკლი აბესაძე კი სპეციალური უფლებამოსილებით აღიჭურვა, რომლის თანახმად მან ამ საკითხთან დაკავშირებით მოლაპარაკება კონკრეტულ კომპანიასთან, ყოველგვარი აუქციონის გარეშე აწარმოა'',-განაცხადა კონსტანტინე ხუჭუამ.
