რუმინეთში ვიზიტად მყოფი საქართველოს პარლამენტის თავმჯდომარე დავით უსუფაშვილი საპარლამენტო დელეგაციასთან ერთად რუმინეთ-საქართველოს საპარლამენტო მეგობრობის ჯგუფის თავმჯდომარე სტეფან ოპრეასა და მეგობრობის ჯგუფის წევრებს შეხვდა. ქართული მხრიდან შეხვედრას ესწრებოდნენ რუმინეთის პარლამენტთან მეგობრობის ჯგუფის ხელმძღვანელი პაატა ბარათაშვილი, რუმინეთის პარლამენტთან მეგობრობის ჯგუფის წევრი გიორგი წერეთელი და საქართველოს საგანგებო და სრულუფლებიანი ელჩი რუმინეთში ილია გიორგაძე.
რუმინეთ-საქართველოს საპარლამენტო მეგობრობის ჯგუფის თავმჯდომარე სტეფან ოპრეამ ქართულ მხარეს დიდი მადლობა გადაუხადა რუმინეთში ჩამობრძანებისთვის. „შარშან, ივნისში ჩემს კოლეგას გამოვუგზავნე მოწვევა და თქვენი ვიზიტი იმის დასტურია, რომ ჩვენს შორის მეგობრობა და თანამშრომლობა გაღრმავდება. საპარლამენტო მეგობრობის ჯგუფები შეიძლება იყვნენ ერთგვარი ელჩები როგორც სახელმწიფო სტრუქტურებს, ასევე ქვეყნებს შორის ურთიერთობების გააქტიურებისთვის",-განაცხადა სტეფან ოპრეამ. მხარეებმა ისაუბრეს ორ ქვეყანას შორის ეკონომიკურ თანამშრომლობაზე.
სტეფან ოპრეამ აღნიშნა, რომ მეგობრობა შეიძლება პარტნიორობად იქცეს. ,,გვჯერა, საქართველოს დიდი რესურსი და პოტენციალი აქვს და მისი გონივრული და სწორი გამოყენება უნდა მოხდეს",-განაცხადა რუმინეთ-საქართველოს საპარლამენტო მეგობრობის ჯგუფის თავმჯდომარემ.
საქართველოს პარლამენტის თავმჯდომარე დავით უსუფაშვილმა დიდი მადლობა გადაუხადა სტეფან ოპრეას გულთბილი მიღებისთვის. მან აღნიშნა, რომ თავისუფალი ვაჭრობის ხელშეკრულება საქართველოს პირველ რიგში იმაში დაეხმარება, რომ ევროპელ მეგობრებს უკეთ დაანახოს ქვეყნის შესაძლებლობები და რესურსები. ,,გვჯერა, რომ საქართველო შეიძლება უფრო აქტიური იყოს. მიუხედავად იმისა, რომ საქართველო რთულ გეოპოლიტიკურ ვითარებაშია, ჩვენ ჩვენი რესურსი გაგვაჩნია. იმედი გვაქვს, რომ ჩვენი შესაძლებლობების უკეთ გამოყენებაში პირველ რიგში შავი ზღვის აუზის ქვეყნები დაგვეხმარებიან, რადგან ისინი ჩვენი უშუალო მეზობლები და მეგობრები არიან",-აღნიშნა პარლამენტის თავმჯდომარემ. შეხვედრაზე მხარეებმა იმედი გამოთქვეს, რომ ქვეყნებს შორის მრავალმხრივი ურთიერთობები კიდევ უფრო გაღრმავდება და ნაყოფიერი გახდება.
