2013 წელს, ფრინველებზე დაკვირვების მიზნით აჭარას 113 უცხოელი სტუმარი ეწვია. როგორც აჭარის ტურიზმის დეპარტამენტში განმარტავენ, მათ სათვალთვალო პუნქტებთან განლაგებულ სოფლის სასტუმრო სახლებში ჯამში 1.010 ღამე გაათენეს, მაშინ როცა 2012 წელს იგივე მიზნით აჭარას 36 ტურისტი სტუმრობდა და სასტუმრო სახლების დატვირთვა სულ 493 ღამეს შეადგენდა.
„სოფელ სახალვაშოსა და ჩაისუბანში განთავსებულ სასტუმროებში 44.390 ლარის მომსახურება იქნა გაწეული, სხვა ხარჯებმა 13.560 ლარი შეადგინა, საბოლოო შემოსავალმა კი 57.950 ლარი. 2012 წელს სოფლის სასტუმროებში შემოსული თანხა 20.105 ლარს შეადგენდა, სხვა ხარჯები 4.320 ლარს, მთლიანი შემოსავალი კი 24.425 ლარს. გამოვლინდა ასევე ეკოტურისტთა მიერ მონახულებული ყველაზე პოპულარული ადგილები: შუამთის ფრინველებზე დაკვირვების პლაცდარმა, სახალვაშოს ფრინველებზე დაკვირვების წერტილი, ბათუმის ბოტანიკური ბაღი, მტირალას ნაციონალური პარკი, ჭოროხის დელტა, ბათუმის ბულვარი და ზღვისპირა პარკი. აღნიშნული მიზნით შემოსული ტურისტები ყველაზე მეტად რეგიონში დამზადებული თაფლის, ღვინის, ჭაჭისა და სხვადასხვა სუვენირის ყიდვით იყვნენ დაინტერესებულნი"- აცხადებენ აჭარის ტურიზმის დეპარტამენტში.
აღსანიშნავია, რომ აჭარის ტურიზმისა და კურორტების დეპარტამენტის მიერ ფრინველებზე დაკვირვების ტურიზმის განვითარების ხელშესაწყობად 2012 წელს დაიხარჯა 28.178 ლარი, ხოლო 2013 წელს კი 15.320. შესაბამისად, გაწეული ხარჯები და ზემოაღნიშნული შემოსავლები ადასტურებს ფრინველებზე დაკვირვების ტურიზმის გრძელვადიან პერსპექტივაზე დამყარებული სტრატეგიის მართებულობას.
როგორც ცნობილია, აჭარის ტურიზმისა და კურორტების დეპარტამენტი ეკოტურიზმის განვითარების ფარგლებში სხვადასხვა პროექტს ახორციელებს. ეკოტურიზმის ერთ-ერთ პოპულარულ მიმართულებას რეგიონში ფრინველებზე დაკვირვების ტურიზმი წარმოადგენს, რომლის ხელშეწყობის მიზნით ჩატარებულია სხვადასხვა სამუშაოები: ფრინველებზე დაკვირვებისათვის შერჩეულ ადგილებში სპეციალური პლაცდარმების მოწყობა და ინფრასტრუქტურული განვითარება სოფელ შუამთაში (ქობულეთის მუნიციპალიტეტი), ფრინველებზე დაკვირვების ბათუმის საერთაშორისო ფესტივალის დამკვიდრება და პოპულარიზაცია, მომსახურების გაუმჯობესების მიზნით სოფლის სასტუმრო სახლების პერსონალის გადამზადება. აჭარის ტურიზმისა და კურორტების დეპარტამენტში საერთაშორისო ორგანიზაცია " Batumi Raptor Count"-თან ერთად ჩატარდა სპეციალური კვლევა, რომლის ანალიზის საფუძველზეც შეგვიძლია დავასკვნათ, თუ რამდენად შედეგიანი და პერსპექტიულია ტურიზმის ამ მიმართულების განვითარება რეგიონში.