(Reuters) - ნატომ გააკრიტიკა რუსეთი იმის გამო, რომ მან გადაწია და განავრცო თავისი საზღვრები საქართველოს სეპარატისტულ აფხაზეთის რეგიონში. მოსკოვმა ეს ახსნა, როგორც სოჭის ზამთრის ოლიმპიური თამაშების გამო უსაფრთხოების ზონის გაფართოებისათვის გადადგმული დროებითი ნაბიჯი.
"ჩვენ უკვე აღვნიშნეთ, რომ ბოლო დროს საქართველოს მთავრობასთან შეუთანხმებლად რუსეთმა მიიღო გადაწყვეტილება აფხაზეთის ე.წ. სასაზღვრო ზონის საქართველოს ტერიტორიის სიღრმეში გადაწევის შესახებ", - თქვა ნატოს ხელმძღვანელმა ანდერს ფოგ რასმუსენმა.
"ჩვენ ძალიან შეშფოთებული ვართ ამ გადაწყვეტილების გამო", - განაცხადა მან ბრიუსელში პრესკონფერენციაზე საქართველოს პრემიერ-მინისტრთან ირაკლი ღარიბაშვილთან საუბრის შემდეგ.
მოსკოვმა 2008 წელს აფხაზეთი და მეორე მეამბოხე ქართული რეგიონი - სამხრეთ ოსეთი დამოუკიდებელ სახელმწიფოებად აღიარა რუსეთ-საქართველოს ხანმოკლე ომის შემდეგ.
საქართველომ დაგმო რუსეთის მოქმედებები, რომელმაც გასულ თვეში აფხაზეთის სიღრმეში 11 კმ-ით (7 მილით) გადაწია საქართველოსთან საზღვარი, და „უკანონო მოქმედება" უწოდა ამ ნაბიჯს, რომელიც არღვევს საქართველოს სუვერენიტეტს.
რუსეთი აცხადებს, რომ ეს არის დროებითი ნაბიჯი იმისათვის, რომ შეიქმნას უსაფრთხო ბუფერული ზონა ზამთრის ოლიმპიური თამაშების ირგვლივ, რომლებიც პარასკევს, აფხაზეთის ახლოს მდებარე ქალაქ სოჭში იწყება.
სოჭში რუსეთის შეიარაღებული ძალები საბრძოლო მზადყოფნაშია. შავი ზღვის ამ საკურორტო ქალაქში შესვლა კი მკაცრად შეიზღუდა გასულ თვეს მას შემდეგ, რაც სამხრეთის ქალაქ ვოლგოგრადში თვითმკვლელმა ტერორისტმა ორი აფეთქება მოახდინა, რომელსაც 34 ადამიანი ემსხვერპლა.
საქართველოს რუსეთთან დიპლომატიური ურთიერთობა 2008 წლის ომის შემდეგ აღარა აქვს და ის არ აგზავნის მთავრობის დელეგაციას სოჭის ოლიმპიადაზე. თუმცა, ქართველ სპორტსმენებს მიეცათ შეჯიბრებებში მონაწილეობის უფლება.
როგორც რასმუსენმა განაცხადა, ნატო ,,საქართველოს სუვერენიტეტისა და მისი საერთაშორისოდ აღიარებული საზღვრების ფარგლებში ტერიტორიული მთლიანობის მტკიცედ ერთგული რჩება". მან ასევე გააკრიტიკა რუსეთი სამხრეთ ოსეთის ტერიტორიის გარშემო მავთულხლართების სასაზღვრო ღობეების აღმართვის გამო.
,,ღობეებისა და სხვა დაბრკოლებების აღმართვა მიუღებელია და ეწინააღმდეგება საერთაშორისო სამართალს და რუსეთის მიერ საკუთარი ვალდებულებების შესრულებას. ის ხელს უშლის მოსახლეობის თავისუფალ გადაადგილებასა და ცხოვრების პირობებს და უნდა გაუქმდეს," - თქვა რასმუსენმა. მან აღნიშნა, რომ ,,21-ე საუკუნე ეს არის ხიდების შენების და არა ღობეების აღმართვის საუკუნე."
ნატო 2008 წელს შეპირდა საქართველოს მომავალში გაწევრიანებს, მაგრამ ეს შეთავაზება შეჩერებულია რუსეთთან ომის შემდეგ.
რასმუსენმა აღნიშნა, რომ ნატო უკან არ იხევს თავისი 2008 წლის ვალდებულებების შესრულებისაგან. მაგრამ ჯერჯერობით არ არის გადაწყვეტილი, კიდევ უფრო მიუახლოვდება თუ არა თბილისი დასავლურ ალიანსთან გაწევრიანების მიზანს ნატოს მომავალ სამიტზე, რომელიც გაიმართება სექტემბერში, უელსში.
რუსეთსა და ნატოს შორის ურთიერთობა დიდი ხანია დაძაბულია ალიანსის იმ გეგმასთან დაკავშირებით, რომელსაც ხელმძღვანელობს აშშ და რომელიც ითვალისწინებს დასავლეთ ევროპის გარშემო, ირანისა და ჩრდილოეთ კორეის თავდასხმისაგან დასაცავად ანტისარაკეტო ფარის განთავსებას. რუსეთი შიშობს, რომ სისტემის თავდაცვით მექანიზმებს შეეძლებათ მისი შორი დამიზნების რადიუსის ბირთვული რაკეტების ჩამოგდება.
გასულ კვირას, აშშ-ის ოფიციალური პირების განცხადებით, ვაშინგტონი განიხილავდა საკითხს, დაარღვია თუ არა შეიარაღების კონტროლის ძირითადი შეთანხმება რუსეთმა ახალი სახმელეთო მოქმედების ფრთიანი რაკეტის გამოცდით.
