პრემიერ-მინისტრი ირაკლი ღარიბაშვილი სოჭის ზამთრის ოლიმპიურ თამაშებში მონაწილე ქართველს სპორტსმენებს წარმატებებს უსურვებს. ამის შესახებ, ღარიბაშვილის მიმართვაშია აღნიშნული, რომელსაც ,,ჯი-ეიჩ-ენი" უცვლელად გთავაზობთ: ,,ოლიმპიურ თამაშებში მონაწილეობა ნებისმიერი სპორტსმენისათვის უაღრესად საპატიოა. ჩვენ ვამაყობთ, რომ ქართველი სპორტსმენები აკმაყოფილებთ ოლიმპიური თამაშების სტანდარტებს და მონაწილეობთ მსოფლიოს საუკეთესო სპორტსმენთა უმაღლესი დონის შეჯიბრებებში.
2014 წლის სოჭის ოლიმპიადაში მონაწილეობა ჩვენში განსაკუთრებულ ემოციებს იწვევს, რადგან ოლიმპიადა ტარდება საქართველო-რუსეთის საზღვართან, ოკუპირებულ აფხაზეთთან ახლოს. მეტად რთული იყო გადაწყვეტილების მიღება ამ ოლიმპიურ თამაშებში მონაწილეობის შესახებ; მაგრამ ჩვენ გავითვალისწინეთ სხვადასხვა ფაქტორი და ეს გადაწყვეტილება ქართული სპორტისა და ჩვენი სპორტსმენების, საქართველოს სახელმწიფოებრივი ინტერესების სასარგებლოდ მივიღეთ. საქართველოს მეგობრები იზიარებენ ჩვენს პოზიციას. დაუშვებელია სპორტის პოლიტიზება. სოჭის ოლიმპიადაში მონაწილეობით საქართველო დგამს კეთილი ნების ნაბიჯს საერთაშორისო თანამეგობრობისა და ზოგადად ოლიმპიური მოძრაობის მიმართ .ახლა ჯერი თქვენზეა, ჩვენს სახელოვან სპორტსმენებზე. მთელი საქართველო, ყველანი თქვენი გულშემატკივარი ვართ და განსაკუთრებული ინტერესით ვადევნებთ თვალს თქვენს წარმატებებს", _ნათქვამია ღარიბაშვილის მიმართვაში.
შეგახსენებთ, რომ სოჭში ოლიმპიადის გახსნის ცერემონიალი გაიმართება. მას, არაოფიციალური ინფორმაციით, 40-ზე მეტი ქვეყნის ლიდერი დაესწრება.
ორგანიზატორები სტუმართა შემადგენლობის გამოქვეყნებისგან თავს იკავებენ, სავარაუდოდ კი, საპატიო სტუმართა სიაში ვიქტორ იანუკოვიჩი, რეჯეფ ტაიპ ერდოღანი, იაპონიის პრემიერ-მინისტრი და გაეროს გენერალური მდივანი იქნებიან.
საზეიმო ცერემონიალში კი ტრადიციული რუსული ატრიბუტიკა იქნება გამოყენებული.
გავრცელებული ინფორმაციით, ცერემონიალში ზამთრის სახეობის ბოლო წლებში წარმატებული სპორტსმენები და რუსი შემსრულებლებიც მიიღებენ მონაწილეობას.