კოალიცია ,,ქართული ოცნების" წევრის ზურაბ აბაშიძის განცხადებით, საქართველოს ხელისუფლების წარმომადგენლები სოჭის ოლიმპიადაში მონაწილეობას არ მიღებენ. როგორც აბაშიძემ რუსეთის პრეზიდენტის პრესსამსახურის მიერ გავრცელებული ინფორმაციის საპასუხოდ განმარტა საქართველოს მთავრობამ ზამთრის ოლიმპიურ თამაშებში მონაწილეობაზე უარი განაცხადა და ეს საკითხი არ გადაიხედება.
,,საქართველოს ხელისუფლების წარმომადგენლები სოჭის ოლიმპიადაში მონაწილეობას არ მიღებენ. ეს არის გადაწყვეტილება, რომელიც საქართველოს ხელისუფლებამ მიიღო. აქედან გამომდინარე ამ კუთხით არანაირი ცვლილებები არ იგეგმება", _აცხადებს აბაშიძე.
შეგახსენებთ, რომ რუსეთის პრეზიდენტის ვლადიმერ პუტინის პრესსამსახურის უფროსი დიმიტრი პესკოვი აცხადებს, რომ არ არის გამორიცხული, სოჭის ოლიმპიადის ფარგლებში ვლადიმერ პუტინი საქართველოს პრეზიდენტს გიორგი მარგველაშვილს შეხვდეს. ინფორმაციას ამის შესახებ სააგენტო „ინტერფაქსი" ავრცელებს.
„ეს გამორიცხული არ არის. ის ხომ ჩვენი სტუმარია", _ განაცხადა პესკოვმა კითხვაზე პასუხის გაცემისას შესაძლოა თუ არა ამგვარი შეხვედრა შედგეს.
