პარლამენტის თავმჯდომარე დავით უსუფაშვილი დღეს საზოგადოებრივი მაუწყებლის სამეურვეო საბჭოს წევრობის -მეურვეობის კანდიდატის შესარჩევი საპარლამენტო საკონკურსო კომისიის წევრებს შეხვდა. შეხვედრის დასრულების შემდეგ, ჟურნალისტებთან საუბრისას, პარლამენტის თავმჯდომარემ მადლობა გადაუხადა კომისიის წევრებს გაწეული ნაყოფიერი და დაძაბული მუშაობისათვის.
„კომისიამ ახალი წლის წინა დღეებში, შემჭიდროებულ ვადებში, მართლაც რომ ინტენსიურად იმუშავა, განიხილა 70-მდე აპლიკანტის განაცხადი, საჯაროდ მოუსმინა კანდიდატებს და სერიოზული შრომა ჩადო ამ პროცესში, რისთვისაც ისინი გულწრფელად იმსახურებენ მადლობას", - განაცხადა პარლამენტის თავმჯდომარემ.
შეხვედრაზე საუბარი შეეხო იმ კითხვებს, რომლებიც აღნიშნულ პროცესებთან დაკავშირებით საზოგადოებაში გაჩნდა. დავით უსუფაშვილის განცხადებით, წამოიჭრა სამართლებრივი ხასიათის საკითხებიც, რომლებზეც შეხვედრის მონაწილეებმა პარლამენტის თავმჯდომარისგან სრული ინფორმაცია მიიღეს.
პარლამენტის თავმჯდომარემ ყურადღება იმ საჯარო წერილზეც გაამახვილა, რომლითაც მას ამ დღეებში მიმართეს და განაცხადა, რომ წერილის ავტორსაც და იმ პირებსაც, ვინც მიმდინარე პროცესებით არიან დაინტერესებულნი, საჯაროდ გასცემს პასუხს და იმ სამართლებრივ თემებზეც ისაუბრებს, რომლებზეც იყო მსჯელობა.
„კიდევ ერთხელ ვიმეორებ, რომ პარლამენტის მხრიდან კანონის არც ერთი პუნქტი არ დარღვეულა. ამავე დროს, კანონის ჩარჩოებში საპარლამენტო უმრავლესობამ თუ უმცირესობამ, სხვა სუბიექტებმა, რა გადაწყვეტილებაც მიიღეს ან არ მიიღეს, ამაზე არის აზრთა სხვადასხვაობა - ზოგი კმაყოფილი დარჩა, ზოგი - უკმაყოფილო, მაგრამ ასეთია ცხოვრება, ყოველთვის ყველა კმაყოფილი ვერ რჩება ამა თუ იმ გადაწყვეტილებით", - განაცხადა პარლამენტის თავმჯდომარემ და კიდევ ერთხელ დაადასტურა, რომ ყველა გადაწყვეტილება არსებული კანონის ჩარჩოებში იქნა მიღებული.
პარლამენტის თავმჯდომარემ ასევე აღნიშნა, რომ პროცესში ჩართულ სუბიექტებს თავისი წილი პასუხისმგებლობა ეკისრებათ და არც თავად გაურბის ამას. „მე, პირადად, როგორც პარლამენტის თავმჯდომარე, რომელსაც გარკვეული როლი ეკისრებოდა პროცესის ორგანიზებაში, ცხადია, სრულად ვიღებ პასუხისმგებლობას იმაზეც, რისი მიღწევაც მოხერხდა - და ვფიქრობ, მოხერხდა სერიოზული შედეგის მიღწევა - და იმაზეც, რაც ვერ მოხერხდა, იმიტომ, რომ უკეთესი განმარტებითი სამუშაოების და პოლიტიკური კონსულტაციებით შესაძლოა მეტი შედეგი მიგვეღო და მეტი მეურვე დაგვენიშნა", - განცხადა დავით უსუფაშვილმა.
პარლამენტის თვმჯდომარის განცხადებით, უახლოეს ხანებში გამოცხადდება კონკურსი სამეურვეო საბჭოს ხუთ ვაკანტურ თანამდებობაზე და შესაბამის სუბიექტებთან კონსულტაციების შემდეგ პარლამენტს შესთავაზებს საკონკურსო კომისიის ახალ შემადგენლობას.
